ԵՐԿՈՒ ՀԱՅ ԼԵՌՆԱԳՆԱՑՆԵՐ ԿՄԱՍՆԱԿՑԵՆ ԷՎԵՐԵՍՏԻ ՆՎԱՃՄԱՆԸ
20-05-2005 21:50:00 | Հայաստան | Սպորտ
ԵՐԵՎԱՆ, 20 ՄԱՅԻՍԻ, ՆՈՅՅԱՆ ՏԱՊԱՆ: 16 երկրների շուրջ 600
լեռնագնացներ մասնակցեցին դեպի Էլբրուս կատարված լեռնագնացությանը,
որը նվիրված էր 2-րդ համաշխարհային պատերազմում տարած հաղթանակի
60-ամյակին: Լեռնագնացությանը մասնակցեցին նաեւ Հայաստանի
ալպինիզմի ազգային ֆեդերացիայի թիմի 5 անդամներ: Ընդ որում, թիմի
կազմում, հայաստանցիներ Հայկ Տոնոյանից, Տիգրան Ներսիսյանցից,
Տիգրան Խաչատրյանից բացի, ընդգրկվել էին նաեւ ռուսաստանցի Արթուր
Կարապետյանը եւ վրաստանցի Լեւ Սարկիսովը: Հայ լեռնագնացների
մասնակցությանը աջակցեց ՄԱԿ-ի հայաստանյանը գրասենյակը:
Ինչպես մայիսի 20-ի ասուլիսում հայտնեց ՀՀ ալպինիզմի
ֆեդերացիայի նախագահ Հայկ Տոնոյանը, մայիսի 3-13-ն իրականացված
վերելքը դեպի Կովկասի ամենաբարձր գագաթը (ծովի մակերեւույթից 5642
մ) անցել է եղանակային չափազանց դժվարին պայմաններում: Չնայած
դրան, լեռնագնացները կամք եւ տոկունություն են դրսեւորել եւ հասել
հաջողության: Գագաթը նվաճողների թվում են եղել նաեւ Ռուսաստանի
դաշնության տարբեր մարզերի, ինչպես նաեւ Ֆրանսիայի, Շվեյցարիայի,
Ավստրիայի, Իտալիայի, Բուլղարիայի ու մի շարք այլ երկրների
լեռնագնացներ: Հայաստանի ներկայացուցիչները Էլբրուսի գագաթին
ամրցրել են ՄԱԿ-ի եւ Հայաստանի Հանրապետության դրոշները:
Հ.Տոնոյանը տեղեկացրեց, որ մի քանի ամսից Ռուսաստանի 20-22
լեռնագնացների հետ երկու հայ լեռնագնացներ մասնակցելու են Էվերեստի
գագաթի նվաճմանը:
Հ.Տոնոյանը աջակցության համար շնորհակալություն հայտնեց ՄԱԿ-ի
հայաստանյան գրասենյակի ղեկավար Լիզ Գրանդեին եւ նրան հանձնեց
Էլբրուսից ետ բերած ՄԱԿ-ի դրոշը: