ԲՈՐԻՍ ՆԱՎԱՍԱՐԴՅԱՆ. «ՀԿ-ՆԵՐԻ ԵՎ ԶԼՄ-ՆԵՐԻ ՀԱՄԱԳՈՐԾԱԿՑՈՒԹՅՈՒՆԸ
ՀԱՅԱՍՏԱՆՈՒՄ ԴԵՌԵՎՍ ԿԱՅԱՑԱԾ ՉԷ»
13-12-2005 20:00:00 | Հայաստան | Հասարակություն
ԵՐԵՎԱՆ, 13 ԴԵԿՏԵՄԲԵՐԻ, ՆՈՅՅԱՆ ՏԱՊԱՆ: Հասարակական
կազմակերպությունների եւ զանգվածային լրատվամիջոցների
համագործակցությանն էր նվիրված դեկտեմբերի 13-ին «Եվրոպական
ինտեգրացիա» ՀԿ-ի նախաձեռնությամբ անցկացված «Հասարակական
կազմակերպությունների եւ ԶԼՄ-ների համագործակցության ներկա վիճակը
եւ զարգացման հեռանկարները» թեմայով սեմինարը:
Կազմակերպության նախագահ Կարեն Բեքարյանի խոսքերով,
ժողովրդավարական պետության կայացման ամենակարեւոր բաղադրիչներից
մեկը ՀԿ-ների եւ ԶԼՄ-ների համագործակցությունն է: Նրա համոզմամբ,
քաղաքացիական հասարակության կառուցման ճանապարհին հանրության այս 2
շերտերի համագործակցությունը անհրաժեշտություն է, քանի որ դրանցից
առաջինը ակտիվորեն արձագանքում է երկրում տեղի ունեցող
իրադարձություններին եւ առաջացած խնդիրներին, իսկ մյուսը` նպաստում
այդ խնդիրների վերլուծությանն ու լուծմանը:
«Հ2» հեռուստաընկերության փոխտնօրեն, քաղաքական մեկնաբան Արամ
Սաֆարյանը նշեց, որ այդ համագործակցությունը իրենց
հեռուստաընկերության պարագայում կայացած է: Դեռեւս 2001թ.-ից
հեռուստաընկերությունը համագործակցում է մի շարք ՀԿ-ների հետ:
Այսպես, հեռուստաընկերությունը հայտ է ստանում այս կամ այն ՀԿ-ից,
որն իրականացնում է ծրագիր եւ ունի ֆինանսներ` դրամաշնորհ: Տվյալ
կազմակերպությունը այդ դրամաշնորհի գումարի որոշակի մասը
տրամադրում է հեռուստաընկերությանը, ինչի դիմաց եւ ստանում է
հեռուստաամբիոն: Ա.Սաֆարյանի խոսքերով, իրենք եթեր չեն կարող
տրամադրել այն ՀԿ-ներին, որոնք չունեն ֆինանսներ, որքան էլ նրանց
ներկայացրած ծրագիրը հետաքրքիր լինի հանրության համար:
Երեւանի մամուլի ակումբի նախագահ Բորիս Նավասարդյանի
դիտարկմամբ, ՀԿ-ների եւ ԶԼՄ-ների համագործակցությունը Հայաստանում
կայացած չէ: Ըստ նրա, այդ գործակցությանը առաջին հերթին
խոչընդոտում է ֆինանսական ռեսուրսների բաժանումը. հայտնի է, որ
Հայաստանում դրամաշնորհները հասու են միայն ՀԿ-ներին, ինչն էլ
բացասական վերաբերմունք է ձեւավորում ԶԼՄ-ների մոտ: Բացի այդ, ըստ
բանախոսի, հանրությունը դեռեւս լավ չի գիտակցում, թե ինչ է ՀԿ-ն եւ
ինչ առաքելություն ունի: Իսկ ԶԼՄ-ները ցայսօր բավարար աշխատանք չեն
կատարում վերջիններիս գործունեությունը հավուր պատշաճի
ներկայացնելու գործում: