ԱԼԲԵՐՏ ՄԿՐՏՉՅԱՆ. «ԵՍ ՀՊԱՐՏ ԵՄ, ՈՐ ՈՒՆԵՄ ԻՄ ՁԵՌԱԳԻՐՆ ՈՒ ՈՃԸ,
ԵՎ ԵՐԲԵՔ ԷԼ ՉԵՄ ՓՈԽԻ ԱՅՆ»
26-11-2008 20:05:00 | Հայաստան | Մշակույթ
ԵՐԵՎԱՆ, 26 ՆՈՅԵՄԲԵՐԻ, ՆՈՅՅԱՆ ՏԱՊԱՆ: Կինոռեժիսոր Ալբերտ
Մկրտչյանի Ղարաբաղյան պատերազմին նվիրված նոր` «Տխուր փողոցի
լուսաբացը» գեղարվեսատական կինոնկարը Հանրային հեռուստատեսությամբ
ցուցադրվելուց հետո տարաբնույթ արձագանքներ է ստացել մամուլում:
Ինչպես նոյեմբերի 26-ին ֆիլմի ռեժիսորի եւ դերասանական խմբի հետ
կայացած հանդիպմանը նշեց մոր կերպարում հանդես եկած դերասանուհի
Անահիտ Քոչարյանը, քննադատության սլաքը հատկապես ուղղվել է իր
կերապարի դեմ. մայրը չի ցանկացել, որ որդին մեկնի պատերազմ:
«Ես կարծում եմ, որ ցանկացած մայր դեմ է, որ իր որդին մեկնի
պատերազմ, եւ դա բնական է: Ընդհակառակը, ռեժիսորի այս մոտեցումը
ավելի է ընդգծել կերպարի արտահայտչությունը, որով էլ
պայմանավորաված է ֆիլմի հաջողվածությունը»,- ասում է
դերասանուհին:
Ղարաբաղյան պատերազմին նվիրված այս կինոնկարի
գործողությունները կատարվում են Գյումրիի փողոցներից մեկում ապրող
մի ընտանիքում, որի հայրն ու ավագ որդին արդեն ռազմաճակատում էին,
իսկ կրտսեր որդին չէր ցանկանում կռվել: Ամբողջ ֆիլմի ընթացքում
միայն մեկ կրակոց է լսվում: «Ես պատերազմը եւ նրա հետեւանքները
փորձել եմ ներկայացնել այդ մեկ ընտանիքի հարկի տակ` առանց
պատերազմական գործաղությունների եւ կրակոցների: Ես կարծում եմ, որ
պատերազմին «Ոչ» ասելու ամենալավ տարբերակը մարդկային հոգիներում
տիրող իրավիճակներն են այդ արհավիրքի դեմ»,- ասում է ռեժիսորը:
Ռեժիսոր Ալբերտ Մկրտչյանի խոսքերով, ֆիլմի զարգացումները եւ
գործողությունները կատարվում են բացառապես «մարդկային հոգեբանական
պատերազմների վրա»: «Հիմա ինձ մոտ հետստեղծագործական դատարկություն
է: Տրամադրությունս էլ շատ վատ է: Միայն մեկ բան է ինձ
ուրախացնում` շնորհավորական զանգերը եւ շնորհակալությունները:
Այո', կարող են լինել նաեւ քննադատություններ, որոնց համար էլ եմ
շնորհակալ»,- ասում է ռեժիսորը:
Լրագրողներից մեկի այն հարցի, թե արդյոք Ա.Մկրտչյանը չի
կրկնել պատերազմի մասին պատմող իր նախորդ` «Հին օրերի երգը» ֆիլմը,
ռեժիսորը պատասխանեց. «Այո, կարող է եւ նման լինել, այդտեղ ոչ մի
տարօրինակ բան չկա, քանի որ երկուսի հեղինակն էլ նույն մարդն է: Ես
հպարտ եմ, որ ունեմ իմ ձեռագիրն ու ոճը, եւ երբեք էլ չեմ փոխի
այն»: