ԸՍՏ ԵՎՐԱՄԻՈՒԹՅԱՆ ԶԵԿՈՒՅՑԻ` ԿԼՈՆԱՎՈՐՎԱԾ ԿԵՆԴԱՆԻՆԵՐԻՑ ՍՏԱՑՎԱԾ
ՍՆՈՒՆԴԸ ՀԱՎԱՆԱԲԱՐ ԱՆՎՏԱՆԳ Է
14-01-2008 19:25:00 | Բելգիա | Միջազգային
ԲՐՅՈՒՍԵԼ, 14 ՀՈՒՆՎԱՐԻ, ՆՈՅՅԱՆ ՏԱՊԱՆ: Ըստ Եվրամիության
սննդամթերքի անվտանգության գործակալության, կլոնավորված
կենդանիներից ստացված կաթը եւ միսը հավանաբար անվտանգ են մարդկանց
համար: Ինչպես հայտնում է «Los Angeles Times» թերթի կայքը,
վկայակոչելով «Associated Press» գործակալությանը, Եվրամիության
Սննդամթերքի անվտանգության մարմնի հայտարարությունը հավանաբար
կթեժացնի սկիզբ առնող բանավեճը այն մասին, թե արդյո՞ք
Եվրամիությունը պետք է թույլ տա, որ կլոնավորված կենդանիները մուտք
գործեն սննդի ոլորտ:
47 էջից բաղկացած զեկույցը, սակայն, նախազգուշացնում է, որ
«միայն սահմանափակ տվյալներ են մատչելի եղել» կենդանիների
կլոնավորման վերաբերյալ: Այն հորդորում էր քննարկումներ անցկացնել
գիտնականների եւ սպառողների հետ, ովքեր նախկինում դեմ էին, որ
թույլատրվի այդպիսի մթերքների մուտքը շուկա:
27 ազգ ներառող միությունը ներկայումս չունի կենդանիների
կլոնավորմանը եւ նրանցից ստացված սննդին առնչվող խնդիրները
կարգավորող որեւէ օրենք: Ինչպես նշել է Եվրամիության
Առողջապահության հարցերով հանձնակատար Մարկոս Կիպրիանուի խոսնակ
Նինա Պապադուլակին, Եվրահանձնաժողովը փորձում է պատասխան տալ այն
հարցին, թե արդյո՞ք կա այդպիսի օրենսդրության կարիք:
Ինչպես նշվում է նախնական զեկույցում, «ըստ առկա տվյալների`
չի ակնկալվում, որ կլոնները կամ նրանց սերունդները սննդի
անվտանգության տեսանկյունից նոր ռիսկեր կներկայացնեն` համեմատած
ավանդական եղանակներով բուծված կենդանիների հետ»:
Նինա Պապադուլակիի խոսքերով, հանձնաժողովը դիմելու է
գիտության եւ նոր տեխնոլոգիաների բնագավառում մասնագիտացած էթիկայի
խմբի եզրակացությանը: Դրա կազմում ընդգրկված են գիտնականներ,
փիլիսոփաներ, աստվածաբաններ եւ իրավաբաններ: Ակնկալվում է, որ
խումբը «սնունդ ստանալու նպատակով կենդանիների կլոնավորման
էթիկական կողմերի» մասին իր սեփական զեկույցը կհրապարակի հունվարի
16-ին:
Եվրամիության անդամ չհանդիսացող որոշ երկրներ քայլեր են
կատարում` կլոնավորված կենդանիները մուտքը սննդի ոլորտ
թույլատրելու համար:
Ակնկալվում է, որ Միացյալ Նահանգները այս տարի կթույլատրի
կլոնավորված կենդանիներից ստացված սնունդի մուտքը շուկա: Սակայն,
2006թ.-ին անցկացված հարցումը ցույց է տվել, որ ամերիկացիների 64
տոկոսը մտահոգված է կենդանիների կլոնավորմամբ:
Ինչպես նշվում է, Ավստրալիան, Նոր Զելանդիան, Ճապոնիան եւ
Կանադան եւս պատրաստվում են քննել այս խնդիրը: