ՖՐԱՆՍԻԱՅՈՒՄ ՍԱՌԵՑՎԵԼ ԵՆ ՄԻ ՇԱՐՔ ՌՈՒՍԱԿԱՆ ՀԻՄՆԱՐԿՆԵՐԻ ԵՎ
ՊԵՏԱԿԱՆ ԸՆԿԵՐՈՒԹՅՈՒՆՆԵՐԻ ՀԱՇԻՎՆԵՐԸ
14-01-2008 19:15:00 | Ֆրանսիա | Միջազգային
ՓԱՐԻԶ, 14 ՀՈՒՆՎԱՐԻ, ՆՈՅՅԱՆ ՏԱՊԱՆ: Ֆրանսիայում շվեյցարական
«ՆՈԳԱ» ընկերության հայցադիմումով սառեցվել են ռուսական մի շարք
հաստատությունների եւ պետական ընկերությունների հաշիվները: Կալանք
է դրվել, մասնավորապես, Կենտրոնական բանկի եւ «ՌԻԱ Նովոստի»
գործակալության հաշիվների վրա: Փարիզի տրիբունալին առընթեր դատական
կատարածուների որոշումն ընդունվել է «ՆՈԳԱ» ֆիրմայի հայցադիմումի
առնչությամբ Ստոկհոլմի միջազգային դատարանի 1997 թվականի փետրվարի
1-ի որոշման հիման վրա, հաղորդում է ԻՏԱՌ-ՏԱՍՍ-ը:
«ՆՈԳԱ» ընկերությունը պնդում է, որ Ռուսաստանը միլիոնավոր
դոլարների գումար է իրեն պարտք 1991 թվականին կնքված
պայմանագրերով: Հենվելով հաշտարար դատարանի որոշման վրա`
ընկերությունը իրավասու է իրեն համարում հասնելու արտասահմանում
ռուսական պետության սեփականության արգելակալանքի: