ՀՆԴԿԱՍՏԱՆԻ «TATA MOTORS LTD.» ԸՆԿԵՐՈՒԹՅՈՒՆԸ ՀԱՆՐՈՒԹՅԱՆՆ Է
ՆԵՐԿԱՅԱՑՐԵԼ ԱՇԽԱՐՀԻ ԱՄԵՆԱԷԺԱՆ ԱՎՏՈՄԵՔԵՆԱՆ
11-01-2008 18:00:00 | Հնդկաստան | Միջազգային
ԴԵԼԻ, 11 ՀՈՒՆՎԱՐԻ, ՆՈՅՅԱՆ ՏԱՊԱՆ: Հնդկաստանի «Tata Motors
Ltd.» ընկերությունը հանրությանն է ներկայացրել աշխարհի ամենաէժան
ավտոմեքենան: Ինչպես հայտնում է «Los Angeles Times» թերթի կայքը,
վկայակոչելով «Reuters» գործակալությանը, չորս տեղանոց «Նանո»-ն
արժե 100 հզ. ռուպի, որը համարժեք է 2.500 ԱՄՆ դոլարի: Այս գինը
մոտ երկու անգամ ցածր է ներկայումս շուկայի ամենաէժան
ավտոմեքենայից, որն արտադրում է «Tata Motors»-ի ամենամեծ
մրցակիցը` «Maruti Suzuki Ltd.» ընկերությունը:
«Tata Motors» ընկերության նախագահ Ռաթան Տատայի
հավաստիացմամբ, իրենց նախագծած ավտոմեքենան համապատասխանում է
անվտանգության բոլոր նորմերին եւ բնապահպանական չափանիշներին:
Ինչպես նշվում է, փոքր եւ կորաձեւ «Նանո»-ն խիստ տարբերվում է
«Jaguar» եւ «Land Rover» շքեղ բրենդերից, որոնք ձեռք բերելու
համար «Tata Motors»-ը բանակցում է «Ford Motor Co» ընկերության
հետ:
«Tata Motors»-ը ծրագրել էր ստեղծել այս ավտոմեքենան տարիներ
առաջ` որպես ավելի ապահով եւ մատչելի այլընտրանքային միջոց
միլիոնավոր մարդկանց համար, ովքեր հաճախ երթեւեկում են մոպեդներով
կամ հեծանիվներով:
Նոր մեքենաները նախընտրելի են Հնդկաստանի գնորդների համար,
որտեղ օգտագործված ավտոմեքենաների կազմակերպված շուկայի
բացակայության պատճառով այդպիսի մեքենաներ գնելը դառնում է
հոգնեցուցիչ, երբեմն նաեւ վտանգավոր:
Բնապահպանները, սակայն, մտահոգված են, որ միլիոնավոր էժան
ավտոմեքենաները կհեղեղեն Հնդկաստանի փողոցները, որոնցից շատերն
արդեն առանց այն էլ գերծանրաբեռնված են, եւ խիստ կմեծացնեն
արտանետումների ծավալը մի երկրում, որն ունի Ասիայի երրորդ
ամենամեծ տնտեսությունը: