ՏԱՍՆՉՈՐՍ ՆԱՎԱՍՏԻ ԱՆՀԵՏ ԿՈՐԵԼ ԵՆ ՀԱՐԱՎԱՅԻՆ ԿՈՐԵԱՅԻ ՋՐԵՐՈՒՄ
25-12-2007 19:55:00 | Կորեա | Միջազգային
ՍԵՈՒԼ, 25 ԴԵԿՏԵՄԲԵՐԻ, ՆՈՅՅԱՆ ՏԱՊԱՆ: Դեկտեմբերի 25-ին
տասնչորս նավաստի է անհետ կորել այն բանից հետո, երբ նրանց նավը
անհետացել է Հարավային Կորեայի հարավային ափից: Այս մասին հայտնում
է «Los Angeles Times»-ը:
Հարավկորեական նավը տեղափոխում էր 2000 տոննա ազոտական թթու,
սակայն քիչ է հավանական, որ այն վտանգ ներկայացնի օվկիանոսին կամ
նավաստիների կյանքին, քանի որ քիմիական նյութը հեշտությամբ
նոսրանում է:
Հարավային Կորեայի ծովային սահմանապահները եւ նավատորմիղը
սկսել են նավի որոնումները, երբ այն դեկտեմբերի 25-ին աղետի
ազդանշան է ուղարկել Սեուլից 283 մղոն դեպի հարավից: Մի քանի ժամ
անց նավաստիներից մեկը գտնվել եւ տեղափոխվել է հիվանդանոց: Սակայն
անձնակազմի մնացած անդամները` 12 հարավկորեացի եւ երկուսը`
Մյանմարից, դեռեւս չեն գտնվել:
Նշենք, որ դեպքը պատահել է այն ժամանակ, երբ Հարավային Կորեան
դեռեւս պայքարում է` վերացնելու համար դեկտեմբերի 7-ին բեռնատար եւ
նավթատար նավերի բախումից առաջացած հետեւանքները: Աղետի պատճառով
նավից 78.920 բարել նավթ էր արտահոսել` աղտոտելով ծովեզրը եւ
վտանգի ենթարկելով երկրի ամբողջ արեւմտյան ափի էկոհամակարգը: