ՊԵՐՈՒԻ ՆԱԽԿԻՆ ՆԱԽԱԳԱՀԸ ԴԱՏԱՊԱՐՏՎԵԼ Է 6 ՏԱՐՎԱ ԲԱՆՏԱՐԿՈՒԹՅԱՆ
12-12-2007 18:55:00 | Պերու | Միջազգային
ԼԻՄԱ, 12 ԴԵԿՏԵՄԲԵՐԻ, ՆՈՅՅԱՆ ՏԱՊԱՆ: Պերուի նախկին նախագահ
Ալբերտո Ֆուխիմորին դատապարտվել է 6 տարվա բանտարկության իրեն
վարկաբեկող նյութերի գողության համար: Դատավորը Ֆուխիմորիին
մեղավոր է ճանաչել նրանում, որ նա իր օգնականներից մեկին հրահանգել
է Պերուի հետախուզության նախկին ղեկավար Վլադիմիրո Մոնտեսինոսի
տնից գողանալ զանազան փաստաթղթերի 40 տուփ, այդ թվում եւ
տեսանյութեր, որոնք վկայում են Ֆուխիմորիի ռեժիմի
հանցագործությունների մասին:
Նախկին առաջնորդը մտադիր է բողոքարկել վճիռը: «Ավելի վաղ
դրանք քաղաքական մեղադրանքներ էին: Այժմ ավելացան նաեւ
քրեականներ»,- լրագրողներին հայտարարել է նրա դուստր Կեյկոն, որի
կարծիքով դատավճիռը չափազանց խիստ է, իսկ դատարանը` կանխակալ: