ԵՄ-Ն ՄՏԱՀՈԳՎԱԾ Է ԽՈՍՔԻ ԱԶԱՏՈՒԹՅԱՆ ԻՐԱՎԻՃԱԿՈՎ ՌՈՒՍԱՍՏԱՆՈՒՄ
10-12-2007 20:45:00 | Բելգիա | Միջազգային
ԲՐՅՈՒՍԵԼ, 10 ԴԵԿՏԵՄԲԵՐԻ, ՆՈՅՅԱՆ ՏԱՊԱՆ: Եվրամիության անդամ
27 երկրների ԱԳՆ ղեկավարները, որ դեկտեմբերի 10-ին հանդիպել են
Բրյուսելում, մտահոգություն են արտահայտել Ռուսաստանում առկա խոսքի
ազատության վիճակի կապակցությամբ, հաղորդում է «Նովոստի»
գործակալությունը:
«Եվրամիությունը շարունակում է մտահոգվել վերջին մեկ տարում
Ռուսաստանում այն իրավիճակի որոշակի զարգացմամբ, որ վերաբերում է
խոսքի, ժողովների եւ զանգվածային լրատվամիջոցների ազատությանը
խորհրդարանական եւ նախագահական ընտրությունների համատեքստում»,-
նշվում է նախարարների ընդունած եզրակացության մեջ:
Նրանում նշվում է, որ Պետդումայի ընտրարշավը «լրիվ չափով չէր
համապատասխանում միջազգային ստանդարտներին»:
Դրանից բացի, մտահոգություն է արտահայտվում Ռուսաստանում
ընդունված ոչ կառավարական կազմակերպությունների գործունեության
մասին օրենքի, ռասիզմի եւ այլատյացության դրսեւորումների, ինչպես
նաեւ Հյուսիսային Կովկասի իրադրության առնչությամբ: