ԲՐՅՈՒՍԵԼ, 7 ԴԵԿՏԵՄԲԵՐԻ, ՆՈՅՅԱՆ ՏԱՊԱՆ: ԵՄ Խորհուրդը հավանություն է տվել բարձր մասնագիտական որակավորում ունեցող միգրանտների ներհոսքը Եվրոպա խթանելու համար «կապույտ քարտ» սահմանելու Եվրոհանձնաժողովի առաջարկությանը: ԵՄ արդարադատության եւ ներքին գործերի նախարարների խորհրդի նիստից հետո ազատության, անվտանգության եւ արդարադատության հարցերով հանձնակատար Ֆրանկո Ֆրատտինին հայտարարել է, որ հանրակցության երկրները համաձայն են Եվրոհանձնաժողովի առաջարկած այդ նոր փաստաթղթի գործողության սկզբունքին: ԵՄ «կապույտ քարտը» կլինի այն փաստաթուղթը, որը կընդլայնի երրորդ երկրներից ԵՄ ժամանող բարձրորակ մասնագետների իրավունքները: Եվրոհանձնաժողովը կարծում է, որ «կապույտ քարտ» ունեցողներին պետք է տրամադրել Եվրոմիության քաղաքացու իրավունքների հետ համադրելի իրավունքներ: Եթե այս առաջարկն ընդունվի, այն կարող է ուժի մեջ մտնել արդեն 2009 թվականից:

---