2007 ԹՎԱԿԱՆԸ ՌԵԿՈՐԴԱՅԻՆ Է ԵՂԵԼ ԱՇԽԱՐՀԻ ԶԼՄ-ՆԵՐԻ ԶՈՀՎԱԾ
ԱՇԽԱՏԱԿԻՑՆԵՐԻ ԹՎՈՎ
29-11-2007 18:45:00 | Բելգիա | Միջազգային
ԲՐՅՈՒՍԵԼ, 29 ՆՈՅԵՄԲԵՐԻ, ՆՈՅՅԱՆ ՏԱՊԱՆ: Աշխարհի ԶԼՄ-ների
զոհված աշխատակիցների թվով 2007 թվականը ռեկորդային է եղել,
հաղորդում է Տեղեկատվական անվտանգության միջազգային ինստիտուտը
(International News Safety Institute, INSI):
Ինստիտուտի տվյալների համաձայն, ընթացիկ տարվա հունվարի 1-ից
մինչեւ նոյեմբերի 28-ն ընկած ժամանակահատվածում 35 երկրներում
զոհվել են 142 լրագրողներ եւ ԶԼՄ-ների տարբեր մասնագիտության 29
աշխատակիցներ (վարորդներ, թարգմանիչներ եւ տեխնիկական աշխատողներ):
2006 թվականի ցուցանիշը` ԶԼՄ-ների 168 զոհված աշխատակիցներ,
գերազանցվել է անցած երեքշաբթի, երբ Շրի-Լանկայում «Թամիլ Իլամի
ազատագրման վագրեր» ծայրահեղական կազմակերպության ապստամբների
վերահսկողության տակ գտնվող «Voice of Tigers» ռադիոկայանի վրա
օդային հարվածի հետեւանքով զոհվել էին նրա երեք աշխատակիցները,
ասվում է INSI-ի հայտարարության մեջ:
Հայտարարությունում ընդգծվում է, որ այս տարվա ընթացքում
ԶԼՄ-ների զոհված աշխատակիցների մեծ մասը` 121 մարդ, սպանվել են
իրենց պարտականությունները կատարելու ժամանակ, 15-ը` պատահական
գնդակից, եւս 34-ը զոհ են ճանապարհատրանսպորտային կամ ավիացիոն
պատահարների հետեւանքով:
ԶԼՄ-ների եւս մեկ աշխատակցի մահվան հանգամանքները մնում են
չբացահայտված:
Ըստ INSI-ի տվյալների, ինչպես անցած տարի, ԶԼՄ-ների ամենամեծ
թվով աշխատակիցներ զոհվել են Իրաքում` 64, իսկ ընդամենը պատերազմի
սկզբից` առնվազն 235 մարդ: Այնուհետեւ այս ցուցակում հաջորդում են
Շրի-Լանկան` վեց զոհված, Աֆղանստանը, Մեքսիկան, Հնդկաստանը եւ
Ֆիլիպինները` 5-ական, Պակիստանը, Սոմալին եւ Հայիթին` չորսական
զոհված: