ՊԱՏԱՆԻ ԲԵՆԻԱՄԻՆ ԳԱԼՍՏՅԱՆԸ ՆՎԱՃԵՑ ԵՐԵՎԱՆԻ ՉԵՄՊԻՈՆԻ ԿՈՉՈՒՄԸ
14-05-2004 17:02:00 | Հայաստան | Սպորտ
ԵՐԵՎԱՆ, 14 ՄԱՅԻՍԻ, ՆՈՅՅԱՆ ՏԱՊԱՆ: Տիգրան Պետրոսյանի անվան
շախմատիստի կենտրոնական տանն ավարտվեց Հայաստանի տղամարդկանց 64-րդ
առաջնության 1-ին խմբի մրցաշարը, որը միաժամանակ Երեւանի
առաջնության կարգավիճակ ուներ: 43 շախմատիստներ մրցեցին
մայրաքաղաքի չեմպիոնի կոչման եւ երկրի առաջնության բարձրագույն
խմբի մրցաշարի 3 ուղեգրերի համար:
Շվեյցարական խաղակարգով անցկացված մրցաշարի 9 մրցափուլերում
վաստակելով 7-ական միավոր` 1-2-րդ տեղերը բաժանեցին միջազգային
վարպետ Արթուր Չիբուխչյանը (Արցախ) եւ Բենիամին Գալստյանը
(Երեւան): Ավելի բարձր մրցաշարային գործակիցներ ուներ պատանի
Բ.Գալստյանը, որին էլ շնորհվեց 1-ին տեղն ու Երեւանի չեմպիոնի
կոչումը: 6,5-ական միավորով 3-4-րդ տեղերը բաժանեցին միջազգային
վարպետ Տիգրան Քոթանջյանը եւ Ավետիք Գրիգորյանը (2-ն էլ` Երեւան):
Ավելի գերադասելի էին Տ.Քոթանջյանի լրացուցիչ ցուցանիշները:
Առաջին երեք տեղերը զբաղեցրած շախմատիստները իրավունք ստացան
հանդես գալու Հայաստանի առաջնության բարձրագույն խմբում: