ԵՐԵՎԱՆ, 12 ԱՊՐԻԼԻ, ՆՈՅՅԱՆ ՏԱՊԱՆ: Երեւանը, Գյումրին,
Վանաձորը, Էջմիածինը, Մասիսը եւ Ստեփանակերտը ներկայացնող 50
բիլիարդիստներ մասնակցեցին «Մոսկովյան բուրգ» խաղաձեւի Հայաստանի
առաջնությանը: Երեւանի «Կվարտ» ակումբում անցկացված առաջնությունն
ընթացավ կիսաօլիմպիական մրցակարգով, երբ 2 պարտություն կրած
մասնակիցը դուրս էր մնում հետագա պայքարից:
4-օրյա մրցումների եզրափակիչ մրցախաղում հանդիպեցին
հանրապետության բազմակի չեմպիոններ Միսակ Հախոյանը եւ Մարտին
Ղալֆաջյանը: Մրցապայքարը շատ համառ ստացվեց եւ ավարտվեց 4:3
հաշվով` հօգուտ Մ.Հախոյանի, որն արժանացավ Հայաստանի չեմպիոնի
կոչմանն ու ոսկե մեդալին: Մ.Ղալֆաջյանը պարգեւատրվեց արծաթե
մեդալով: Բրոնզը բաժին հասավ 3-րդ տեղը գրաված Կարեն Վարդանյանին:
Բոլոր 3 մրցանակակիրներն էլ ներկայացնում են Երեւանը: