15-ԱՄՅԱ ՀԱՅ ՇԱԽՄԱՏԻՍՏԸ ԴԱՐՁԱՎ ՄՈՍԿՈՎՅԱՆ ՓԱՌԱՏՈՆԻ ՄՐՑԱՆԱԿԱԿԻՐ
25-02-2004 17:08:00 | Հայաստան | Սպորտ
ԵՐԵՎԱՆ, 25 ՓԵՏՐՎԱՐԻ, ՆՈՅՅԱՆ ՏԱՊԱՆ: Մոսկվայում անցկացվող
«Աերոֆլոտ Օփեն» շախմատային փառատոնի 3 մրցաշարերից 2-ն արդեն
ավարտվել են:
«C» մրցաշարում հիանալի հանդես եկավ Հայաստանի ներկայացուցիչ,
15-ամյա Ավետիք Գրիգորյանը: Վերջին` 9-րդ, մրցափուլից առաջ նա 7,5
միավորով գլխավորում էր մրցաշարային աղյուսակը եւ վերջնական
հաջողության լավ հնարավորություններ ուներ: Սակայն վճռական
հանդիպումը Ավետիքը տանուլ տվեց եւ ի վերջո բաժանեց 2-4-րդ տեղը:
Բայց սա էլ շատ բարձր արդյունք է: Իսկ «C» մրցաշարի հաղթող դարձավ
Ալեքսանդր Պոտապովը, որը 8 միավոր վաստակեց:
«B» մրցաշարում, 9 հնարավորից վաստակելով 7,5-ական միավոր,
1-4-րդ տեղերը բաժանեցին ռուսաստանցի շախմատիստներ Անատոլի
Շվեդչիկովը, Ձակայ Ձակաեւը եւ Վրաստանի ներկայացուցիչներ Գիորգի
Բագատուրովն ու Դավիթ Հարությունյանը: Այս մրցաշարում Հայաստանի
ներկայացուցիչներից առավել հաջող հանդես եկան Լեւոն Բաբուջյանը,
Աշոտ Նադանյանը եւ Տիգրան Քոթանջյանը, որոնք 6,5-ական միավոր
վաստակեցին:
Ուժեղագույն «A» խմբում մասնակիցներին մնացել է անցկացնել
մեկական հանդիպում: 8 մրցափուլից հետո միանձնյա առաջատարը
ռուսաստանցի Վալերի Ֆիլիպովն է, որը 6,5 միավոր ունի: Նրան
անմիջապես հաջորդող 7 շախմատիստներից բաղկացած խմբում է նաեւ
Ռաֆայել Վահանյանը, որը 6 միավոր է վաստակել: Ընդ որում, 8-րդ
մրցափուլում նա պարտության մատնեց պատանի Տիգրան Լ. Պետրոսյանին:
«A» խմբում Կարեն Ասրյանը 5,5 միավոր է վաստակել եւ նույնպես բարձր
տեղ գրավելու հնարավորություն ունի: