ՀԱՂԹՈՂՆԵՐԸ ԿՈՐՈՇՎԵՆ «ԱԵՐՈՖԼՈՏ ՕՓԵՆ»-Ի ՎԵՐՋԻՆ ՄՐՑԱՓՈՒԼԵՐՈՒՄ
24-02-2004 17:56:00 | Հայաստան | Սպորտ
ԵՐԵՎԱՆ, 24 ՓԵՏՐՎԱՐԻ, ՆՈՅՅԱՆ ՏԱՊԱՆ: Մոսկվայում ընթացող
շախմատի «Աերոֆլոտ Օփեն» փառատոնը մոտենում է ավարտին:
Ուժեղագույն «A» խմբում շարունակում են հաջող հանդես գալ
Հայաստանի ներկայացուցիչներ Ռաֆայել Վահանյանը, Կարեն Ասրյանը,
Արտաշես Մինասյանը, Տիգրան Լ. Պետրոսյանը, որոնք 7 մրցափուլից հետո
վաստակել են 5-ական միավոր: Այս խմբում ամեն ինչ կորոշեն վերջին 2
մրցափուլերի հանդիպումները:
«B» եւ «C» խմբերում մասնակիցներին մնացել է անցկացնել 1-ական
հանդիպում:
«B» խմբում Հայաստանի շախմատիստներից առավել բարձր արդյունքն
ունի պատանի Լեւոն Բաբուջյանը: Նա 8 հանդիպումներում վաստակել է
6,5 միավոր եւ գտնվում է առաջատարների խմբում: Բենիամին Գալստյանը
եւ Աշոտ Նադանյանը ունեն 6-ական միավոր, Տիգրան Քոթանջյանը եւ
Դավիթ Պետրոսյանը` 5,5-ական:
«C» խմբում հիանալի է խաղում 15-ամյա Ավետիք Գրիգորյանը: Ութ
մրցափուլից հետո նա 7,5 միավորով միանձնյա գլխավորում է
մրցապայքարը: