ԱՆԴՐԱՆԻԿ ՄԱՏԻԿՈՒԼՅԱՆԸ ՀԱՂԹԵՑ ԱԳՈՒՐԱ ՀԻԼԶԻ ՄՐՑԱՇԱՐՈՒՄ
06-02-2004 18:18:00 | Հայաստան | Սպորտ
ԵՐԵՎԱՆ, 6 ՓԵՏՐՎԱՐԻ, ՆՈՅՅԱՆ ՏԱՊԱՆ: Կալիֆոռնիայի նահանգի
Ագուրա Հիլզ քաղաքում օրերս ավարտված «Արեւմտյան դասի
առաջնություն» անվանումը կրող մրցաշարում հիանալի հաղթանակ տարավ
Հայաստանի ներկայացուցիչ, միջազգային վարպետ Անդրանիկ
Մատիկուլյանը: Երիտասարդ շախմատիստը շվեյցարական մրցակարգով
անցկացված մրցաշարում 7 հնարավորից վաստակեց 6 միավոր եւ միանձնյա
նվաճեց 1-ին մրցանակը: Անդրանիկն առաջ անցավ այնպիսի ուժեղ
գրոսմայստերներից, ինչպիսիք են Էլվեստը (Էստոնիա), Երմոլինսկին
(ԱՄՆ), Բլատնին (Չեխիա):
Նախկին երեւանցի, իսկ այժմ ԱՄՆ-ը ներկայացնող Վարուժան
Հակոբյանը վաստակեց 5 միավոր եւ Երմոլինսկու հետ բաժանեց 3-4-րդ
տեղերը:
Եվս մեկ նախկին երեւանցի, ներկայումս Լոս Անջելեսում բնակվող
միջազգային վարպետ Մելիքսեթ Խաչիյանը Կանզաս նահանգի Լինդսբուրգ
քաղաքում անցկացված խոշոր մրցաշարում 9 հնարավորից վաստակեց 6
միավոր եւ բաժանեց 4-6-րդ տեղերը: Նա լրացրեց գրոսմայստերի նորմա: