ՏԻԳՐԱՆ ՊԵՏՐՈՍՅԱՆԻ 75-ԱՄՅԱԿԻՆ ՆՎԻՐՎԱԾ ՊԱՏԱՆԵԿԱՆ ՇԱԽՄԱՏԻ
ՓԱՌԱՏՈՆԸ Ի ՀԱՅՏ ԲԵՐԵՑ ՆՈՐ ԱՆՈՒՆՆԵՐ
20-01-2004 17:15:00 | Հայաստան | Սպորտ
ԵՐԵՎԱՆ, 20 ՀՈՒՆՎԱՐԻ, ՆՈՅՅԱՆ ՏԱՊԱՆ: «Չեսս» շախմատային
ակադեմիայի նախաձեռնությամբ անցկացվեց պատանեկան շախմատի փառատոն,
որը նվիրված էր աշխարհի 9-րդ չեմպիոն Տիգրան Պետրոսյանի ծննդյան
75-ամյակին:
Տղաները մրցեցին 4, իսկ աղջիկները` 2 տարիքային խմբերում:
Մրցումներն անցկացվեցին շվեյցարական մրցակարգով, 9 մրցափուլով:
Բոլոր 6 մրցաշարերում ընդհանուր առմամբ հանդես եկան 223
մասնակիցներ:
Հետաքրքիր եւ լարված մրցապայքարի արդյունքում խմբերի
հաղթողներ դարձան հետեւյալ շախմատիստները. աղջիկներ - Աստղիկ
Մեսեջյան (Երեւան, մինչեւ 12 տարեկանների խումբ), Անահիտ Խառատյան
(Վանաձոր, 13-18 տ.), տղաներ - Նորայր Թորոսյան (Գյումրի, մինչեւ
10 տ.), Գրիգոր Դիլանյան (Էջմիածին, 11-12 տ.), Գեւորգ Ալավերդյան
(Հրազդան, 13-14 տ.), Վահրամ Մեջլումյան (Երեւան, 15-18 տ.):
Ինչպես «ՆՈՅՅԱՆ ՏԱՊԱՆ»-ի թղթակցի հետ զրույցում նշեց «Չեսս»
ակադեմիայի ղեկավար, գրոսմայստեր Սմբատ Լպուտյանը, փառատոնը շատ
կարեւոր եւ անհրաժեշտ էր մեր պատանի շախմատիստների համար: «Այն ի
հայտ բերեց նոր անուններ: Մենք կրկին համոզվեցինք, որ
հանրապետության քաղաքներում ու մարզերում քիչ չեն օժտված
երեխաները, որոնց հետ, իհարկե, պետք է լուրջ աշխատանք տանել»,-
ասաց նա:
Ըստ Ս.Լպուտյանի, հունվարի 21-30-ը Արզնիում կանցկացվ
ձմեռային ուսումնամարզական հավաք, որին կհրավիրվեն նաեւ այս
մրցումներում աչքի ընկած մի խումբ շախմատիստներ: