ՊԱՐԳԵՎՆԵՐ ՀԱՆՁՆՎԵՑԻՆ ՖՈՒՏԲՈԼԻ 2003-Ի ԱՌԱՋՆՈՒԹՅԱՆ
ՄՐՑԱՆԱԿԱԿԻՐՆԵՐԻՆ
19-12-2003 19:45:00 | Հայաստան | Սպորտ
ԵՐԵՎԱՆ, 19 ԴԵԿՏԵՄԲԵՐԻ, ՆՈՅՅԱՆ ՏԱՊԱՆ: Հայֆիլհարմոնիայի փոքր
դահլիճում դեկտեմբերի 19-ին տեղի ունեցավ Հայաստանի ֆուտբոլի 2003
թվականի մրցաշրջանի մրցանակակիրների պարգեւատրման արարողությունը:
ՀՀ Ֆուտբոլի ֆեդերացիայի գործկոմի անդամ, ֆիզկուլտուրայի
ինստիտուտի ռեկտոր Վահրամ Առաքելյանը առաջնության 1-ին խմբի
մրցաշարում հաղթանակած Երեւանի «Կիլիկիա» ակումբի ղեկավարներին ու
ֆուտբոլիստներին հանձնեց փոքր ոսկե մեդալներ ու 1-ին կարգի
դիպլոմներ: «Կիլիկիայի» ավագ Կարեն Զաքարյանին հանձնվեց փոխանցիկ
գավաթը:
Բարձրագույն խմբում երրորդ տեղը գրաված Գյումրիի «Շիրակ»
թիմին Հանրապետական ֆեդերացիայի կողմից բրոնզե մեդալներ հանձնեց
գործկոմի անդամ, «Դինամո-2000» ակումբի նախագահ Լեւոն Հասրաթյանը:
Բարձրագույն խմբի մրցաշարում 2-րդ տեղը գրավելու համար արծաթե
մեդալներով ու 2-րդ կարգի դիպլոմներով պարգեւատրվեցին Երեւանի
«Բանանցի» ղեկավարները, մարզիչներն ու ֆուտբոլիստները: Ի դեպ, թիմի
հարձակվող Արա Հակոբյանը, մրցակիցների դարպասը խփելով 45 գնդակ,
ճանաչվել է առաջնության լավագույն ռմբարկու, ինչպես նաեւ Հայաստանի
2003 թվականի լավագույն ֆուտբոլիստ:
Գլխավոր պարգեւները` ոսկե մեդալներն ու փոխանցիկ գավաթը,
հանձնվեցին Երեւանի «Փյունիկի» ներկայացուցիչներին: Պարգեւները
թիմին հանձնեց հանրապետական սպորտկոմիտեի փոխնախագահ Միքայել
Իսպիրյանը:
«Ֆուտբոլ+» շաբաթաթերթի «Արդար խաղի» մրցանակը հանձնվեց
Հայաստանի ֆուտբոլի ֆեդերացիայի նախագահ` Ռուբեն Հայրապետյանին: