ԵՐԵՎԱՆ, 20 ՆՈՅԵՄԲԵՐԻ, ՆՈՅՅԱՆ ՏԱՊԱՆ: Կանադայի Վանկուվեր
քաղաքում ընթացող ծանրամարտի աշխարհի առաջնությունում հիանալի
հանդես եկավ 77 կգ քաշային գյումրեցի մարզիկ Գեւորգ Դավթյանը:
Երկամարտում նա ցույց տվեց 355 կգ արդյունք եւ գրավեց 2-րդ տեղը,
ընդամենը 2,5 կգ-ով զիջելով աշխարհի չեմպիոն դարձած իրանցի Մոհամադ
Նեջադին: Հայ մարզիկը երկամարտում նվաճած մեծ արծաթե մեդալից բացի
փոքր բրոնզե պարգեւի արժանացավ պոկում վարժությունում (160 կգ) եւ
արծաթե` հրում վարժությունում (195 կգ) ցույց տված արդյունքների
համար: Նույն քաշային կարգում հանդես եկած Արսեն Մելիքյանը պոկում
վարժությունում չկարողացավ բարձրացնել նախնական քաշը եւ «0» միավոր
ստացավ:
Մրցահարթակ էին ելել Հայաստանի եւս 2 ծանրորդներ` Արմեն
Ղազարյանը (62 կգ քաշային կարգ), որը գրավել է 7-րդ տեղը, եւ
Արթուր Դանիելյանը (69 կգ)` 19-րդ տեղ:
Այժմ Հայաստանի հավաքականը թիմային հաշվարկում զբաղեցնում է
8-րդ տեղը: Ամենայն հավանականությամբ, կարելի է ավելի բարձր տեղի
հույս ունենալ, քանի որ հայ եւս 4 ծանրորդներ են մրցասպարեզ
մտնելու: