ԵՐԵՎԱՆ, 11 ՆՈՅԵՄԲԵՐԻ, ՆՈՅՅԱՆ ՏԱՊԱՆ: Երեւանի «Դինամո»
մարզադահլիճում անցկացվեցին ձյուդոյի Հայաստանի տղամարդկանց ու
կանանց առաջնությունները, որոնց մասնակցեցին ավելի քան 100
մարզիկներ ու մարզուհիներ: Երկօրյա մրցապայքարից հետո երկրի
չեմպիոններ դարձան հետեւյալ մասնակիցները. տղամարդիկ` 60 կգ`
Հովհաննես Դավթյան (Գյումրի), 66 կգ` Արմեն Նազարյան (Հրազդան), 73
կգ` Լեւոն Գալստյան (Երեւան), 81 կգ` Լաերտ Ավագյան (Վանաձոր), 90
կգ` Արամայիս Մարտիրոսյան (Երեւան), 100 կգ` Արթուր Գասպարյան
(Երեւան), 100 կգ-ից բարձր` Վահե Սարգսյան (ԲՄԱ): Կանանցից
ուժեղագույնների կոչման արժանացան հետեւյալ մարզուհիները` Քրիստինե
Նաջարյանը (Երեւան), 63 կգ` Լիլիթ Պողոսյանը (Արտաշատ), 78 կգ`
Ռոզա Սահակյանը (Գյումրի):
Հայաստանի ուժեղագույն ձյուդոյիստներն այժմ կնախապատրաստվեն
եկող տարվա առաջին ամիսներին անցկացվելիք Եվրոպայի առաջնությանն ու
միջազգային մրցաշարերին, որտեղ կխաղարկվեն Աթենքի օլիմպիական
խաղերի ուղեգրեր: Սակայն առաջիկայում մեր երիտասարդական հավաքականի
անդամներին մեկ այլ կարեւոր ստուգատես է սպասում` Եվրոպայի
առաջնությունը: Այն տեղի կունենա Բոսնիա-Հերցեգովինայում,
նոյեմբերի 22-24-ը: Հավաքականի ավագ մարզիչ Դավիթ Խիթարյանը
«Նոյյան Տապան»-ի թղթակցին հայտնեց, որ թիմի թեկնածուները
Հայաստանի առաջնությունում բավարար պատրաստականություն
ցուցադրեցին: Դա առաջին հերթին վերաբերում է թեթեւ քաշային
կարգերում հանդես եկած ձյուդոյիստներին: Ավագ մարզիչը հույս
հայտնեց, որ իր սաները Եվրոպայի առաջնությունում կարող են հաջող
հանդես գալ: