ԳՐՈՍՄԱՅՍՏԵՐ ԳԱԲՐԻԵԼ ՍԱՐԳՍՅԱՆԸ ՀԱՂԹԵՑ ՈՒՍԱՆՈՂԱԿԱՆ ԱՆԴՐԱՆԻԿ
ԱՌԱՋՆՈՒԹՅՈՒՆՈՒՄ
20-10-2003 17:48:00 | Հայաստան | Սպորտ
ԵՐԵՎԱՆ, 20 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ: Գյուղակադեմիայում
անցկացվեց արագ շախմատի Հայաստանի ուսանողական անդրանիկ
առաջնությունը: Մասնակիցներից յուրաքանչյուրին ամեն հանդիպմանը
տրվում էր 25 րոպե: Չեմպիոնի կոչումը վիճարկեցին տարբեր բուհեր
ներկայացնող 10 շախմատիստներ: Առավել հաջող հանդես եկավ միջազգային
գրոսմայստեր Գաբրիել Սարգսյանը: Ֆիզկուլտուրայի ինստիտուտի շախմատի
բաժանմունքի 2-րդ կուրսի ուսանողը 9 պարտիաներից 8-ում հաղթեց, 1
հանդիպում ավարտեց ոչ-ոքի եւ 8,5 միավորով գրավեց 1-ին տեղը: 7
միավորով 2-րդ մրցանակակիր դարձավ միջազգային վարպետ Դավիթ
Պետրոսյանը (ֆիզկուլտուրայի ինստիտուտ): 3-րդը Բենիկ Գալստյանն էր
(Ճարտարագիտական համալսարան), որը 6,5 միավոր վաստակեց: