ԱԱԽ քարտուղար Արթուր Բաղդասարեանի հրաւէրով Լեհաստանի Հանրապետութեան Ազգային անվտանգութեան բիւրոյի պատուիրակութեան` Հայաստանի Հանրապետութիւն կատարած պաշտօնական այցի շրջանակներում հոկտեմբերի 17-ին ԱԱԽ քարտուղար Արթուր Բաղդասարեանն ընդունել է Լեհաստանի Ազգային անվտանգութեան բիւրոյի ղեկավար Ստանիսլավ Կոզիեյին: Երկկողմ քննարկմանը յաջորդել է ընդլայնուած կազմով հանդիպում ԱԱԽ աշխատակազմի ներկայացուցիչների եւ Լեհաստանի Հանրապետութեան պատուիրակութեան մասնակցութեամբ: Ստանիսլավ Կոզիեյը իր գոհունակութիւնն է յայտնել երկու երկրների միջեւ յարաբերութիւնների զարգացման դինամիկ տեմպերի կապակցութեամբ եւ համոզմունք յայտնել, որ հայ-լեհական համագործակցութիւնը հետայսու եւս վերելք է ապրելու: Կարեւոր ձեռքբերում համարելով ՀՀ Ազգային անվտանգութեան խորհրդի աշխատակազմի եւ Լեհաստանի Ազգային անվտանգութեան բիւրոյի աշխատակազմերի միջեւ ուղիղ կապի ստեղծումը եւ տեղեկատուութեան պարբերական փոխանակութիւնները` ԱԱԽ քարտուղար Արթուր Բաղդասարեանը փաստել է, որ նախորդ տարուայ հանդիպումները Լեհաստանի Հանրապետութիւնում արդիւնաւէտ երկխօսութիւն սկիզբ հանդիսացան: Որպէս փոխշահաւէտ համագործակցութեան արդիւնք ԱԱԽ քարտուղարն այս մէկ տարուայ ընթացքում կատարուած աշխատանքից առանձնացրել է երկու երկրների պաշտպանութեան եւ ոստիկանութեան կառոյցների միջեւ կնքուած համագործակցութեան համաձայնագրերը, Հայաստանում բիոմետրիկ անձնագրերի ներդրման, ինչպէս նաեւ թունաքիմիկատների վերամշակման ծրագրերում Լեհաստանի հետ արդիւնաւէտ համագործակցութեան փաստը: Հանդիպման ընթացքում ձեռք են բերուել մի շարք կոնկրէտ պայմանաւորուածութիւններ: Մասնաւորապէս, որոշուել է շարունակել միջպետական պայմանագրերի իրականացման գործընթացի պարբերական մոնիտորինգների փոխանակութիւնները: Այս համատեքստում քննարկուել է յաջորդ տարի պայմանագրերի իրականացման գործընթացում ներգրաւուած պաշտօնատար անձանց մասնակցութեամբ հայ-լեհական երկկողմ կոնֆերանսի կազմակերպման հարցը, որտեղ կը ներկայացուեն պայմանագրերի իրականացման արդիւնքները եւ կը նախանշուեն հայ-լեհական համագործակցութեան օրակարգի նոր ուղղութիւնները: Կողմերը համաձայնութեամբ կը ձեւաւորուի նաեւ Եմ-ի հետ ինտէգրման եւ Արեւելեան Գործընկերութեան նախաձեռնութեան շրջանակներում Հայաստանի Հանրապետութեան եւ Լեհաստանի Հանրապետութեան միջեւ համագործակցութեան օրակարգը, որտեղ կը նախանշուեն Հայաստանում Եմ-ի չափորոշիչներին ներդաշնակ բարեփոխումների գործընթացում Լեհաստանի աջակցութեան հնարաւոր մեխանիզմները: Ի լրումն, պայմանաւորուածութիւն է ձեռք բերուել մշակել տարբեր ոլորտներում հայ-լեհական միջգերատեսչական առկայ համագործակցութեան ամփոփ պատկերն արտացոլող փաստաթուղթ, որը հիմք կը հանդիսանայ խնդիրները մշտապէս ուշադրութեան կենտրոնում պահելու եւ յետագայ համագործակցութեան արդիւնաւէտութեան խթանման համար: Լեհ բարձրաստիճան պաշտօնեան նշել է, որ Լեհաստանի Հանրապետութիւնը պատրաստակամ է ըստ ամենայնի աջակցել Հայաստանի Հանրապետութիւնում ընթացող բարեփոխումներին` ընդգծելով, որ իր երկրի փորձը ցոյց է տուել, թէ որքան կարեւոր նշանակութիւն կարող է ունենալ մէկ այլ կողմի աջակցութիւնն այս գործընթացներում: Ըստ ԱԱԽ-ի մամլոյ հաղորդագրութեան, այցի շրջանակներում Ստանսիլաւ Կոզիեյը հանդիպումներ է ունենալու ՀՀ Նախագահ Սերժ Սարգսեանի, ՀՀ Արտաքին գործերի նախարար Էդուարդ Նալբանդեանի եւ ՀՀ Պաշտպանութեան նախարարի տեղակալ Արա Նազարեանի հետ, այցելելու է Ծիծեռնակաբերդի յուշահամալիր եւ Էջմիածին:

---