Հոկտեմբերի 30-ին տեղի ունեցած Հայաստանի Հանրապետական կուսակցութեան առաջին տնտեսական համաժողովի շրջանակում վարչապետ Տիգրան Սարգսեանը պատասխանել է լրատուամիջոցների ներկայացուցիչների հարցերին: Ստորեւ ներկայացնում ենք ՀՀ վարչապետի ճեպազրոյցի սղագրութիւնն ամբողջութեամբ: ՀՀ վարչապետ Տիգրան Սարգսեան - Յարգելի գործընկերներ, ցանկանում եմ շնորհակալութիւն յայտնել ձեզ` Հանրապետական կուսակցութեան առաջին տնտեսական կոնֆերանսը լուսաբանելու համար: Մենք կարեւորում ենք այս կոնֆերանսի անցկացումը, քանի որ այն հարթակ է, որը հնարաւորութիւն է տալիս իշխող կուսակցութեանը հանդէս գալ հաշուետուութեամբ ոչ միայն կուսակիցների, այլեւ հանրութեան առջեւ: Այս առումով, մենք կարեւորում ենք ձեր կատարած աշխատանքը, որպէսզի մեր հաշուետուութեան մէջ զետեղուած բոլոր նիւթերը հասնեն նաեւ մեր հանրութեանը: Հարց «Ազատութիւն» ռադիօկայան - Երկու հարց, պարոն վարչապետ: Ձեր յայտարարութիւնը, ըստ որի` այն ուժերը, ովքեր չեն համագործակցի Հանրապետական կուսակցութեան հետ, կը յայտնուեն կոտրուած տաշտակի առջեւ, ո՞ր քաղաքական ուժին էր ուղղուած: Երկրորդ, Դուք` որպէս Հանրապետական կուսակցութեան գործադիր մարմնի անդամ, ու՞մ թեկնածութիւնն էք տեսնում Երեւանի քաղաքապետի պաշտօնում: ՀՀ վարչապետ Տիգրան Սարգսեան - Այն պատասխանը, որ ես տուել եմ Ազգային Ժողովում, մէջբերուած էր Հանրապետութեան նախագահի խօսքերից` կամուրջներ կառուցելու մասին: Իմ այդ արտայայտութեան ենթատեքստը հասկանալի էր, քանի որ ես մէջբերեցի Հանրապետութեան նախագահի յայտնի յայտարարութիւնն այն մասին, որ մենք ցանկանում էք ընդդիմութեան հետ կառուցել համագործակցութեան կամուրջներ: Կարծում եմ, որ ապագայում մեզ սպասուող մարտահրաւէրները ցոյց են տալիս, որ այդ համագործակցութիւնը խիստ անհրաժեշտ է: Եթէ մենք տեսնում ենք դեստրուկտիւ մօտեցումներ, ապա արձանագրում ենք, որ նրանք յայտնուելու են կոտրուած տաշտակի առջեւ: Իսկ մենք ունենք կարողութիւններ եւ հնարաւորութիւններ` Հանրապետութիւնում ցնցումներ թոյլ չտալու համար: Մենք ցանկութիւն ունենք կառուցելու մեր ապագան համագործակցութեան մթնոլորտի շնորհիւ: Սա է իմ յայտարարութեան իմաստը: Միեւնոյն ժամանակ ես արձագանքել եմ լրատուական միջոցների տարբեր վարկածներով հարցադրումներին: Ցանկացած հարցուպատասխանի պարագայում լրագրողները կարող են տարբեր կերպ մեկնաբանել իմ պատասխանները: Բայց այն, ինչ ցանկանում էի ասել, կարծում եմ` ձեզ համար հասկանալի է: Իսկ ինչ վերաբերում է կոալիցիոն գործընկերների հետ համագործակցութեանը, ապա այդ տեսակէտից մենք մշտապէս առաջնորդուել ենք համերաշխութեան ապահովման սկզբունքով եւ արել ենք ամէն ինչ, որպէսզի այդ համագործակցութիւնը կայանայ: Դուք տեղեակ էք, որ Հանրապետական կուսակցութիւնը կարող էր միայնակ ձեւաւորել իշխանութիւնը, սակայն Հանրապետութեան Նախագահը, հաւատարիմ մնալով իր կողմից առաջ քաշուած սկզբունքներին, նախապատուութիւնը մշտապէս տալիս է համագործակցութեանը: Նախագահի այդ սկզբունքի հիման վրայ էլ ձեւաւորուել է կոալիցիոն կառավարութիւնը, որը գործում է ստորագրուած յուշագրում արտացոլուած սկզբունքների հիման վրայ: Ինչ վերաբերում է երկրորդ հարցին, ապա կարծում եմ, որ այդ հարցի շուրջ Հանրապետութեան Նախագահն իր խօսքը կ'ասի: Հարց Ա1-պլիւս - Հարցս կրկին վերաբերում է նախկին քաղաքապետ Կարէն Կարապետեանին: Կան լուրեր, որ քաղաքապետը դաւաճանել է ձեր թիմին: Ինչպէ՞ս կը մեկնաբանէք դրանք: ՀՀ վարչապետ Տիգրան Սարգսեան - Կարծում եմ` ընդհանրապէս ճիշտ չէ, որպէսզի վարչապետն ինչ-որ լուրեր մեկնաբանի: Ես առաջնորդւում եմ այն բացատրութիւններով, որոնք հրապարակաւ տուել է Կարէն Կարապետեանը: Նրա հետ հանդիպում եմ ունեցել, որտեղ նա մանրակրկիտ ներկայացրել է հրաժարականի իր փաստարկները, որոնք ամբողջութեամբ համապատասխանում են իր հրապարակային յայտարարութեանը: Որեւէ այլ ենթատեքստ ես չեմ տեսնում եւ այլ մեկնաբանութիւնների հետ համամիտ չեմ: Հարց «Հրապարակում» հեռուստածրագիր - Պարոն վարչապետ, 2008 թուականի համեմատ ինտերնետ կապի մեծածախ գները նուազել են շուրջ 24 անգամ: Ինչո՞վ է սա պայմանաւորուած, եւ արդեօք հնարաւոր չէ նոյն մեխանիզմը կիրառել նաեւ այլ ոլորտներում: ՀՀ վարչապետ Տիգրան Սարգսեան - Շնորհակալութիւն, իսկապէս սա մեր հաշուետուութեան մէջ շատ կարեւոր հատուած է: Ընդամէնը երեք տարի առաջ մէկ մէգաբիթ ինտերնետ կապն արժէր մէկ միլիոն 200 հազար դրամ: Այսօր այն արժէ 34 հազար դրամ: Դա էական առաջընթաց է, քանի որ հնարաւորութիւն է տալիս ապահովել ինտերնետի հասանելիութիւնը: Մի շարք գործօններ կան, որոնք ազդել են գների նուազման վրայ: Առաջինը, Հայաստանի կառավարութիւնը տեղեկատուական տեխնոլոգիաների եւ հեռահաղորդակցութեան ոլորտը հռչակել է որպէս առաջանահերթութիւն: Ունենք խորհուրդ, որում ներառուած են մասնաւոր հատուածի ներկայացուցիչները, որոնք մեզ հետ միասին քննարկում են համալիր միջոցառումների ծրագրի իրականացման ընթացքը, որի նպատակն է ստեղծել բարենպաստ միջավայր այս ոլորտի զարգացման համար: Մենք իրականացրել ենք օրէնսդրական փոփոխութիւններ, ընդունել բազմաթիւ նորմատիւային ակտեր, յանձնարարականներ են տրուել բոլոր գերատեսչութիւններին` վերացնելու համար այն գործառոյթները, որոնք խոչընդոտում են տեղեկատուական տեխնոլոգիաների զարգացմանը: Եթէ ընդամէնը երեք տարի առաջ մենք ունէինք 80 հազար ինտերնետից օգտուող, ապա այսօր այդ թիւը կազմում է 350 հազար: Սա հանրութեան բաւական լուրջ զանգուած է: Ինտերնետն այսօր սովորական ընտանիքի համար դարձել է անբաժանելի մաս: Հարց «Առկա» լրատուական գործակալութիւն - Կա՞ն արդեօք նոր մանրամասնէր Եւրազէս-ում քննարկուող վարկի վերաբերեալ, որը պէտք է տրամադրուի «նաիրիտե-ին: Եթէ կան, ապա կը խնդրէի ներկայացնել դրանք: ՀՀ վարչապետ Տիգրան Սարգսեան - Հայաստանի Հանրապետութեան կառավարութիւնը դեռեւս նախորդ տարի դիմել էր Եւրազէս-ի շրջանակում առկայ հակագնաժամային հիմնադրամին, որպէսզի քննարկուի «նաիրիտէ գործարանի արդիականացման ծրագիրը: Բաւական մանրակրկիտ այս ծրագիրը քննարկուել է, Հակաճգնաժամային հիմնադրամի կողմից գործուղուել են մասնագէտներ Հայաստան, որոնք ուսումնասիրել են քիմիական ոլորտը, պատրաստել այդ ոլորտի վերաբերեալ համալիր փաստաթուղթ, որպէսզի ճշգրիտ գնահատուի «Նաիրիտ»-ի հեռանկարներն ու տեղը քիմիական արդիւնաբերութեան մէջ: Այս պահի դրութեամբ անհրաժեշտ է, որպէսզի ունենանք օպերատոր, որը պատրաստ է իր վրայ վերցնել «նաիրիտ»-ի մենեջմենթը: Մեզ համար կարեւոր է նաեւ, որպէսզի այդ վարկը տրամադրուի օպերատորի առկայութեան դէպքում, որպէսզի լրացուցիչ ռիսկերը կառավարութիւնն իր վրայ չվերցնի: Այսօր աշխատանք է տարւում, որպէսզի այդ մեծածաւալ գումարները, մի կողմից տրամադրուեն յուսալի գործընկերոջը, որը մասնագիտական կարողութիւններ ունի այդ բնագաւառում, միւս կողմից` կառավարութեանը զերծ պահեն աւելորդ ռիսկերից: Երբ այս աշխատանքները հասնեն իրենց տրամաբանական աւարտին, բնականաբար, դրանք հանրութեանը կը ներկայացնենք: Խնդիրը ձգձւում է այն պարզ պատճառով, որ «նաիրիտե-ն ինքը բաւական մեծ գործարան է` բարդ տեխնոլոգիական գործառոյթներով, եւ նրա զարգացման հնարաւորութիւնները բազմազան են, ուղղութիւնները` բազմաթիւ: Այստեղ արագ, շուտափոյթ լուծումները վտանգաւոր են, դրա համար էլ այսքան երկար եւ մանրամասն այս հարցը քննարկւում է: Մենք ունենք գերմանական մի ընկերութիւն, որը զբաղւում է տեխնիկական բիզնես ծրագրի մշակմամբ: Առկայ են մի քանի ընկերութիւններ եւս, որոնց հետ բանակցում ենք, որպէսզի կարողանանք ներգրաւել օպերատոր: Միեւնոյն ժամանակ, այս խնդիրը քննարկում ենք Արժոյթի միջազգային հիմնադրամի եւ Համաշխարհային բանկի հետ, որովհետեւ այդ վարկային միջոցների ներգրաւումը մենք պէտք է անենք այնպէս, որ Հայաստանի Հանրապետութեան համար լրացուցիչ ֆինանսական ռիսկեր չառաջանան: Հարց «Օրակարգ» օրաթերթ - Ձեր կառավարութիւնը 2009 թուականից խօսում է հարկային եւ մաքսային ոլորտներում բարեփոխումների կարեւորութեան մասին: Ինչու՞ են բարեփոխումները որոշակիօրէն դանդաղում: Պետական եկամուտների կոմիտէի նախագահը ռիսկային է համարում 101 մլրդ դրամ հարկերի հաւաքագրումը եւ նշում, որ իրեն պէտք է ուղղութիւն ցոյց տրուի: Պատրաստւու՞մ է արդեօք ֆինանսների նախարարութիւնը կամ կառավարութիւնը ցոյց տալ այդ ուղղութիւնը: ՀՀ վարչապետ Տիգրան Սարգսեան - Մօտակայ օրերին մենք մանրակրկիտ այս հարցը քննարկելու ենք, քանի որ դուք տեղեակ էք, որ երեքշաբթի Ազգային ժողովում սկսելու են 2012 թուականի բիւջէի նախագծի քննարկումները, եւ մենք մանրամասն արդէն կը ներկայացնենք, թէ ինչ է ընկած 2012 թուականի բիւջէի հիմքում: Երբ խօսում ենք հարկեր-հնայ ցուցանիշի մասին, մենք ձեզ հետ միասին պարտաւոր ենք հաշուի առնել հակաճգնաժամային այն միջոցառումները, որն իրականացրել է կառավարութիւնը եւ այն միջավայրը, որը մենք ձեւաւորեցինք վերջին չորս տարիների ընթացքում: Առաջին հերթին մենք տուեցինք բազմաթիւ հարկային արտօնութիւններ եւ՛ փոքր ու միջին, եւ՛ խոշոր բիզնեսին: Այսօր շուրջ 35 հազար յարկ վճարողներ օգտւում են այդ հարկային արտօնութիւններից: Այդ հարկային արտօնութիւնները մենք տրամադրեցինք նրա համար, որպէսզի հեշտացնենք մեր տնտեսվարող սուբյեկտների համար այն դժուարութիւնների յաղթահարումը, որոնք առաջանում են ճգնաժամի հետեւանքով. սա է առաջին եւ կարեւոր հանգամանքը: Երկրորդը` մենք փոխեցինք աւելացուած արժէքի հարկի շեմը, որը նոյնպէս իր ազդեցութիւնը թողում է հարկային բազայի վրայ: Երրորդը` մենք ընդլայնեցինք հաստատագրուած վճարների դաշտը: Այս գործօնները չէին կարող չանդրադառնալ ընդհանուր հարկային բազայի վրայ, եւ այդ տեսակէտից, երբ մենք հաշուարկում ենք հարկեր-հնայ ցուցանիշը, պէտք է անպայման այս հանգամանքը հաշուի առնենք: Բայց դա չի նշանակում, որ դեռեւս չունենք անելիքներ: Դեռեւս մենք ունենք բաւական մեծ ստուերային տնտեսութիւն, եւ մեր ջանքերն առաջին հերթին ուղղուած են ստուերային տնտեսութեան կրճատմանը եւ արդարութեան սկզբունքի ներդրմանը հարկային դաշտում: Դա բաւական բարդ գործառոյթ է, որը ենթադրում է լրջագոյն փոփոխութիւններ եւ մնում է մեր առաջնահերթութիւններից մէկը: Իսկ Ազգային ժողովում աւելի մանրակրկիտ կ'անդրադառնանք այն խնդրին, թէ մենք ինչպէս ենք ապահովելու, ինչպիսի օրէնսդրական նախաձեռնութեամբ է հանդէս գալու կառավարութիւնը, որպէսզի մենք կարողանանք ապահովել լրացուցիչ նախորդ տարուայ հետ համեմատած 101 միլիարդ դրամի հաւաքագրումները: Դրա համար մենք ներկայացնում ենք մի այնպիսի փաթեթ, որի նպատակն է բարձր եկամուտներ ունեցողներից աւելի շատ հարկային եկամուտներ հաւաքագրել եւ այդ եկամուտները բերել պետական բիւջէ: Նաեւ մեր փաթեթում ներառուած են մէկ տասնեակից աւել օրէնսդրական առաջարկութիւններ եւ փոփոխութիւններ, որոնք պարզեցնում են հարկային վարչարարութիւնը եւ ստեղծում փոքր եւ միջին բիզնեսի համար աւելի բարենպաստ միջավայր: Դա նշանակում է, որ մեր միտումն է փոքր եւ միջին բիզնեսի վրայ հարկային բեռը թեթեւացնել եւ այդ հարկային բեռը տեղափոխել այն ոլորտներ, որտեղ կան մեծ եկամուտներ: Հարց «Հանրային ռադիօ» - Այսօր հանրութեան շրջանում որոշակի անվստահութիւն կայ որոշակի իշխանական օղակների հանդէպ: Կարո՞ղ էք Դուք այսօր հաւատացնել, որ կառավարութիւնն ունի բաւական քաղաքական կամք` քաղաքացուն յուզող պատասխանները ներկայացնելու համար: ՀՀ վարչապետ Տիգրան Սարգսեան - Շնորհակալութիւն հարցի համար: Բնականաբար, մենք մշտապէս մեր ուշադրոթեան կենտրոնում ենք պահում հանրապետութիւնում տիրող տրամադրութիւնները: Դրա համար էլ կազմակերպում ենք մարզային հանդիպումներ մեր քաղաքացիների հետ, նախարարները իւրաքանչիւր ամիս ընդունելութիւններ են կազմակերպում, տեղեկատուութիւն են հաղորդում նաեւ մեր կուսակցական գործընկերները: Քաղաքացիների հետ մեր անմիջական շփումների ժամանակ էլ տեսնում ենք այդ տրամադրութիւնները: Մենք շփւում ենք նաեւ մեր ընդդիմադիր գործընկերների հետ, որոնք ներկայացնում են իրենց դժգոհութիւններն ու այլընտրանքային մօտեցումները: Սրանք նպաստում են նաեւ, որպէսզի մենք մշտապէս լինենք աչալուրջ: Այդ տեսակէտից, մենք ուշադրութեամբ քննարկում ենք բոլոր առաջարկութիւնները, որոնք ներկայացւում են ոչ միայն մեր կոալիցիոն գործընկերների, այլեւ ընդդիմադիր գործիչների կողմից: Բոլոր այն առաջարկութիւնները, որոնք համահունչ են մեր ծրագրերին, անպայման ներառում ենք մեր ծրագրերում: Եռամսեակային կտրուածքով, ըստ մարզերի, անցկացնում ենք սոցիալական հետազօտութիւններ, որոնց արդիւնքները մշտապէս տեղադրւում են կառավարութեան կայքէջում: Դրանցով բացայայտում ենք նաեւ այն հիմնախնդիրներն ու մտահոգութիւնները, որոնք արտայայտում են մեր քաղաքացիները: Մենք քաջատեղեակ ենք այդ տրամադրութիւններին եւ գիտենք, թէ որ ոլորտներում կան նուաճումներ, բացթողումներ, այսինքն` գիտենք մեր խոցելի եւ ուժեղ կողմերը: Այս ամէնը մեզ վստահութիւն է տալիս, որպէսզի կատարենք այնպիսի պնդումները, որոնք արտացոլուած էին այսօրուայ մեր տնտեսական կոնֆերանսի բանաձեւում: Հարց Հանրային հեռուստաընկերութիւն` «Առաջին լրատուական» - Փաստօրէն տնտեսական կոնֆերանսը կատարուած աշխատանքի ամփոփումն է: Այսուհետ ինչպիսի՞ խնդիրներ կը լինեն Հանրապետական կուսակցութեան ուշադրութեան կենտրոնում, բացի տարածքային համաչափ զարգացումն ու հնարաւոր տնտեսական նոր ճգնաժամը: ՀՀ վարչապետ Տիգրան Սարգսեան - Ամենակարեւոր երկու խնդիրները նշեցիք: Այժմ ողջ աշխարհը մտահոգուած է, թէ այս բացասական միտումները, որ արձանագրւում են համաշխարհային տնտեսութեան մէջ, ինչպիսի՞ ազդեցութիւն են ունենալու եւ այլ հարցերով: Սա, բնականաբար, այն կարեւորագոյն առանցքային խնդիրն է, որը պէտք է գտնուի նաեւ մեր ուշադրութեան կենտրոնում: Մենք նոյնպէս պէտք է լինենք ուշադիր, կարողանանք գնահատել հնարաւոր ռիսկերը: Այդ տեսակէտից ձեր կողմից մատնանշուած երկու հանգամանքին ես ցանկանում եմ աւելացնել երրորդը, ինչի մասին այսօր եղան բազմաթիւ ելոյթներ: Այսինքն, մենք պարտաւոր ենք դիւերսիֆիկացնել մեր տնտեսութեան կառուցուածքը, քանի որ դիւերսիֆիկացիան տնտեսութեան համար ապահովում է աւելի քիչ խոցելիութիւն: Սա մեր առաջնահերթութիւններից մէկն է: Այսօր մեր կուսակիցներին ներկայացուեց այն գաղափարը, որը մենք մշակում ենք: Դա արդիւնաբերական նոր քաղաքականութիւնն է` միտուած արտահանմանը: Շուտով այն կը ներկայացուի նաեւ հանրութեանը: Այս ծրագրի վերաբերեալ ըստ ոլորտների` կոնեակագործութեան, ճշգրիտ սարքաւորումների, վերամշակող արդիւնաբերութեան եւ այլ ոլորտներում, արդէն իսկ անցկացւում են քննարկումներ: Այս ամէնի արդիւնքում կը ներկայացնենք կառավարութեան արդիւնաբերական քաղաքականութեան նոր մօտեցումը, որը, մի կողմից, նպաստելու է տնտեսութեան դիւերսիֆիկացիային, միւս կողմից` արտահանման ծաւալների աճին, ինչը մեզ համար չափազանց կարեւոր է:

---