Արմէն Գէորգեանն ընդունեց Համաշխարհային բանկի հայաստանեան գրասենեակի ղեկավար Ժան Միշել Հափիին
18-05-2011 17:33:39 | Հայաստան | Տնտեսութիւն
ՀՀ փոխվարչապետ, տարածքային կառավարման նախարար Արմէն Գէորգեանն այսօր ընդունեց Համաշխարհային բանկի հայաստանեան գրասենեակի ղեկավար Ժան Միշել Հափիին:
Փոխվարչապետը նախ շնորհակալութեան յայտնեց համապետական մարդահամարի անցկացման գործընթացին ՀԲ աջակցութեան համար: Ներկայացուեց մարդահամարի նախապատրաստական աշխատանքների ընթացքը: Հիմնական աշխատանքներն իրականացուել են, հայկական կողմը ներկայումս աշխատում է միջազգային դոնոր կազմակերպութիւնների, տարբեր պետութիւնների հետ` միջոցների ներգրաւման ուղղութեամբ:
Կողմերը կարեւորեցին մարդահամարի անցկացումը եւ հաւաքագրուած տուեալների նշանակութիւնը պետութեան զարգացման հեռանկարային ծրագրերի համար: Քննարկուեցին լրացուցիչ միջոցների ներգրաւման հնարաւորութիւնները:
Ըստ ՏԿՆ հասարակայնութեան հետ կապերի բաժնի մամլոյ հաղորդագրութեան,
զրուցակիցներն անդրադարձան նաեւ ոռոգման համակարգի ենթակառուցուածքների զարգացմանն ուղղուած ՀԲ նոր ծրագրի հետ կապուած հարցերին:
Երկուստէք կարեւորուեց ոռոգման համակարգում ներդրումների իրականացումը, արձանագրուեց, որ համակարգի բարելաւումը նպաստելու է տարածքների համաչափ զարգացմանը, որի կարեւոր բաղադրիչն էլ արդիւնաւէտ գիւղատնտեսութեան զարգացումն է: