Մարտի 17-18-ին Երեւան քաղաքում տեղի ունեցաւ Պահպանողական կուսակցութեան 10-րդ արտահերթ համագումարը` «հհ ԱԺ 2012թ. մայիսեան ընտրութիւններին Պահպանողական կուսակցութեան մասնակցութիւնէ օրակարգային մէկ հարցով: Համագումարն ընդունեց 10 որոշում, այդ թւում` Բանաձեւ: Ըստ Պահպանողական կուսակցութեան մամլոյ հաղորդագրութեան, համագումարի ընդունած որոշումներով, մասնաւորապէս, ՀՀ ԱԺ մայիսի 6-ի ընտրութիւններին մասնակցութեան հարցում նախապատուութիւն է տրուել Հայ ազգային կոնգրէսի դաշինքին: Որոշուել է յիշեալ ընտրութիւններին մեծամասնական ընտրակարգով թեկնածուներ չառաջադրել, նաեւ` Պահպանողական կուսակցութեան Կենտրոնական խորհրդին յանձնարարել նախապատրաստել կուսակցութեան հերթական` 11-րդ համագումար հրաւիրելը ոչ ուշ, քան 2012թ. հոկտեմբեր ամիսը: Մէկ այլ որոշմամբ հաստատուել է Պահպանողական կուսակցութեան 10-րդ արտահերթ համագումարի հետեւեալ բանաձեւը. «Հաշուի առնելով, որ այ) Պահպանողական կուսակցութիւնը 1999թ.-ի սկզբից հետեւողականօրէն զբաղուել է ՀՀ Հիմնադիր-նախագահ Լեւոն Տէր-պետրոսեանի քաղաքական վերադարձի քարոզչութեամբ եւ նախապատրաստմամբ, բ) 2008թ.-ի նախագահական ընտրութիւնների պաշտօնապէս հրապարակուած արդիւնքներն անընդունելի էին հասարակութեան մեծամասնութեան եւ Պահպանողական կուսակցութեան համար, գ) 2007թ. սեպտեմբերի 21-ից սկսուած քաղաքական գործընթացը ՀՀ Հիմնադիր-նախագահի քաղաքական պարտիան է, որի` նրա կողմից 2012թ. խորհրդարանական ընտրութիւններով տրամաբանական հանգրուանի հասցնելուն օժանդակելը Պահպանողական կուսակցութիւնն իր բարոյական պարտքն է համարում, դ) 2012թ. մայիսեան խորհրդարանական ընտրութիւնները Պահպանողական կուսակցութիւնը դիտարկում է որպէս 2008թ.-ի նախագահական ընտրութիւնների 2-րդ փուլ, պահպանողական կուսակցութիւնը 2012թ.-ի ՀՀ ԱԺ ընտրութիւններում կրկին պաշտպանում է ՀՀ Հիմնադիր-նախագահ Լեւոն Տէր-պետրոսեանին` անկախ նրա հրապարակելիք նախընտրական ծրագրի բովանդակութիւնից ու նախընտրական ցուցակի կազմից: պահպանողական կուսակցութիւնը վերահաստատում է իր համոզմունքը, որ Հայաստանի պետականութեան թիւ մէկ քաղաքական խնդիրն այսօր Սահմանադրական կարգի հաստատումն է, իսկ առաջիկայում` յօգուտ քաղաքակրթական Արեւմտեան համակարգի ընտրանք կատարելը: Հայաստանում Սահմանադրական կարգի հաստատման եւ Հայաստանն Արեւմտեան քաղաքակրթական համակարգին հարազատօրէն ինտէգրելու նպատակով Պահպանողական կուսակցութիւնը կը նախապատրաստուի գալիք նախագահական ընտրութիւններին սեփական թեկնածուով հանդէս գալու համար: Պահպանողական կուսակցութիւնը պատրաստակամ է սոյն Բանաձեւին հարիր մօտեցումներ ունեցող բոլոր քաղաքական ուժերի եւ հասարակութեան անդամների հետ լայն համագործակցութեան»:

---