Երեւանի եւ Մարսելի միջեւ ստորագրուած բարեկամութեան եւ համագործակցութեան համաձայնագրի 20 ամեակի կապակցութեամբ Երեւանի քաղաքապետ Տարօն Մարգարեանի գլխաւորած պատուիրակութիւնն այցելել է Ֆրանսիայի Հանրապետութեան Մարսել քաղաք: այցի առաջին օրը` յունիսի 21–ին, Տարօն Մարգարեանը հանդիպել է իր գործընկերոջ` Մարսելի քաղաքապետ Ժան-կլոդ Գոդենի հետ: Ողջունելով Երեւանի քաղաքապետին եւ նրան ուղեցկող պատուիրակութեան անդամներին, Ժան-Կլոդ Գոդենը նշել է, որ երկու քաղաքների միջեւ ձեւաւորուած բարեկամութեան ակուքները շատ աւելի խորը արմատներ ունեն, քան անցած 20 տարիները: Երեւանի եւ Մարսելի համագործակցութիւնը դիտարկելով հայ-ֆրանսիական ներկայիս ամուր եւ ջերմ յարաբերութիւնների համապատկերում, Մարսելի քաղաքապետն ընդգծել է, որ երկու քաղաքների համագործակցութիւնը այդ տեսանկիւնից եւս պէտք է լինի համարժէք եւ համակողմանիօրէն ընդգրկուն: <<Վստահեցնում եմ Ձեզ պարոն քաղաքապետ, որ մենք իսկապէս բարձր ենք գնահատում մեր քաղաքների միջեւ հաստատուած բարեկամութիւնն ու համագործակցութիւնը եւ կը շարունակենք քայլեր ձեռնարկել, որպէսզի այն էլ աւելի ամրապնդուի եւ նորանոր յաջողութիւններ արձանագրի>>- նշել է Ժան-Կլոդ Գոդենը: Շնորհակալութիւն յայտնելով պաշտօնական հրաւէրի եւ ջերմ ընդունելութեան համար, քաղաքապետ Տարօն Մարգարեանն առանձնակի կարեւորել է Մարսելի քաղաքապետի կողմից Հայաստանին եւ հայութեանն առնչուող հարցերի նկատմամբ մշտապէս ցուցաբերուող գործնական հետաքրքրութիւնը: << Մարսելի եւ Երեւանի 20-ամեայ համագործակցութիւնը եւս մէկ վկայութիւնն է հայ-ֆրանսիական դարաւոր բարեկամութեան եւ, եթէ հաշուի առնենք նաեւ ցեղասպանութիւնից մազապուրծ հազարաւոր հայերի համար Մարսելի երկրորդ հայրենիք դառնալու հանգամանքը, ապա վստահաբար կարող ենք ասել, որ Մարսելն իրապէս մեծ դերակատարում ունի հայ-ֆրանսիական յարաբերութիւնների ընդլայնաման ու ամրապնդման գործում>>,-ընդգծել է Երեւանի քաղաքապետը: Անդրադառնալով Երեւանի եւ Մարսելի համագործակցութեան ուղղութիւններին ու համատեղ իրականացուող ծրագրերին, քաղաքապետ Տարօն Մարգարեանը նշել է, որ երկու քաղաքների միջեւ գործակցութեան առկայ ներուժին եւ զարգացման հեռանկարներին համահունչ` ցանկալի է վերանայել համագործակցութեան համաձայնագիրը. <<Այդպիսով մենք կը յստակեցնենք փոխգործակցութեան առաջնահերթութիւններն ու վստահաբար կ'ապահովենք երկուստէք փոխշահաւէտ արդիւնքներ>>,- ընդգծել է Տարօն Մարգարեանը` առաջարկելով ստեղծել աշխատանքային խմբեր, որոնք կ'ուսումնասիրեն համագործակցութեան բոլոր առաջարկները: Երեւանի քաղաքապետը Ժան-Կլոդ Գոդենին առաջարկել է նաեւ Մարսելի քաղաքապետարանի աջակցութեամբ ֆրանսիացի գործարարներին ներկայացնել Երեւանի ներդրումային դաշտը եւ առաջարկել նրանց փոխշահաւէտ ներդրումային ծրագրեր իրականացնել Երեւանում: Նոյն օրը Երեւանի քաղաքապետը հանդիպում է ունեցել ֆրանս–հայկական առեւտրաարդիւնաբերական պալատի եւ գործարար համայնքի ներկայացուցիչների հետ: Հանդիպման ընթացքում ներկայացնելով Երեւանում ներդրումային հնարաւորութիւններն ու բարենպաստ միջավայրը, Տարօն Մարգարեանը նշել է. «Երեւանի քաղաքապետարանը որդեգրել է շատ կարեւոր մի սկզբունք, ըստ որի մենք բաց ու պատրաստակամ ենք քննարկել ցանկացած առաջարկ, որը կը նպաստի Երեւանի զարգացմանը: Հաշուի առնելով, որ Երեւանի եւ Մարսելի փոխգործակցութիւնը զարգացման ու ընդլայնման բաւականաչափ ներուժ ունի, վստահ եմ, որ դուք էլ աւելի ակտիւ մասնակցութիւն կարող էք ունենալ Երեւանի զարգացմանն ուղղուած ներդրումային ծրագրերում»,- ընդգծել է քաղաքապետը: Երեւանի քաղաքապետարանի տեղեկատուութեան եւ հասարակայնութեան հետ կապերի վարչութիւնից յայտնում են, որ հանդիպմանը ներկայ ֆրանսահայ յայտնի կինոռեժիսոր Անրի Վերնոյի որդու` Պատրիկ Մալաքեանի հետ զրոյցի ընթացքում քաղաքապետ Տարօն Մարգարեանը նշել է նաեւ, որ ներկայում քննարկւում է Երեւանում մեծ կինոռեժիսորի անունով փողոց անուանակոչելու հարցը: Իր եւ ողջ ընտանիքի անունից շնորհակալութիւն յայտնելով Երեւանի քաղաքապետին նման նախաձեռնութեամբ հանդէս գալու համար, Պատրիկ Մալաքեանը նշել է, որ դա իսկապէս մեծ պատիւ է իրենց համար եւ վստահեցրել է, որ իր հնարաւորութեան սահմաններում աջակցել Երեւանում իրականացուող ծրագրերին:

---