Շարունակւում են Ազգային անվտանգութեան խորհրդի քարտուղար Արթուր Բաղդասարեանի գլխաւորած պատուիրակութեան հանդիպումները Հնդկաստանում: Ինչպէս հաղորդում է Ազգային անվտանգութեան խորհրդի քարտուղարի մամուլի գրասենեակը, Հնդկաստանի Ազգային անվտանգութեան խորհրդի քարտուղար Շիւ Շանկար Մենոնի եւ Արթուր Բաղդասարեանի առանձնազրոյցից յետոյ կայացել են ընդլայնուած բանակցութիւններ, քննարկուել են անվտանգութեան ոլորտում հայ-հնդկական համագործակցութեան յետագայ խորացման հնարաւորութիւնները: Պայմանաւորուածութիւն է ձեռք բերուել Հնդկաստանի եւ Հայաստանի միջեւ անվտանգութեան հարցերով պարբերաբար խորհրդակցութիւններ անցկացնել, ինչը հնարաւորութիւն կը տայ աւելի մօտեցնել միմեանց դիրքորոշումները անվտանգութեան մարտահրաւէրներին դիմակայելու գործում: Կողմերը կարեւորել են երկխօսութիւնը տարածաշրջանային եւ միջազգային անվտանգութեան ապահովման գործում: Արթուր Բաղդասարեանը Շիւ Շանկար Մենոնին հրաւիրել է Հայաստան, հրաւէրն ընդունուել է: Քննարկուել է նաեւ Հայաստան կատարուելիք այցի ընթացքում Հայաստանի եւ Հնդկաստանի անվտանգութեան խորհուրդների միջեւ անվտանգութեան ոլորտում համագործակցութեան մասին յուշագիր ստորագրելու հարցը, ինչը նոր լիցք կը հաղորդի երկու երկրների փոխյարաբերութիւններին, կը ստեղծուի երկկողմ հետքրքրութիւն ներկայացնող տարաբնոյթ հարցեր քննարկելու գործուն մեխանիզմ: Հեռահաղորդակցութեան եւ տեղեկատուական տեխնոլոգիաների պետնախարար Սաչին Պայլոտի հետ հանդիպման ընթացքում քննարկուել են բարձր տեխնոլոգիաների ոլորտում համագործակցութեան խորացման, միջբուհական համատեղ կրթական ծրագրերի իրականացման եւ երկկողմ հետաքրքրութիւն ներկայացնող այլ հարցեր: Հանդիպման ընթացքում որոշուել է կեանքի կոչել դեռեւս 2006 թուականին ձեռք բերուած պայմանաւորուածութիւնը` Երեւանում բացել տեղեկատուական տեխնոլոգիաների հայ-հնդկական կենտրոն: Արթուր Բաղդասարեանը յոյս է յայտնել, որ դա կարող է հիմք հանդիսանալ այս ոլորտում յետագայ համագործակցութեան խորացման համար: Կողմերը պայմանաւորուել են ջանքեր գործադրել այս տարուայ ընթացքում կենտրոնի ստեղծման մեկնարկը տալու համար: Սաչին Պայլոտը պատրաստակամութիւն է յայտնել ըստ ամենայնի աջակցել այդ գործին: Պայմանաւորուածութիւն է ձեռք բերուել նաեւ աշնանը Երեւանում կազմակերպել համաժողով, որին կը մասնակցեն երկու երկրների բարձր տեխնոլոգիաների ոլորտի մասնագէտներ, գիտնականներ, գործարարներ: Արթուր Բաղդասարեանը հանդիպել է նաեւ Հնդկաստանի առեւտրաարդիւնաբերական պալատի դաշնութեան գլխաւոր տնօրէն Ռաջիւ Կումարի հետ: Պայմանաւորուածութիւն է ձեռք բերուել խորացնել հայ-հնդկական տնտեսական համագործակցութիւնը, ընթացիկ տարուայ սեպտեմբերին կազմակերպել հայ-հնդկական գործարար համաժողով:

---