ՀԱԿ-ը սատարում է սոցիալական խմբերին ոտնահարուած իրաւունքների
համար պայքարում
17-02-2011 13:24:00 | Հայաստան | Քաղաքական
ԳԻՒՄՐԻ, 17 ՓԵՏՐՈՒԱՐԻ, ՆՈՅԵԱՆ ՏԱՊԱՆ: ՀԱԿ Գիւմրու տարածքային
գրասենեակն իր մտահոգութիւնն է յայտնել Հայաստանում օր-օրի
ծանրացող սոցիալ-տնտեսական վիճակի, ապրանքների գների անհիմն
թանկացումների, քրեաօլիգարխիկ համակարգի կողմից ստեղծուած` այլեւս
անհանդուրժելի պայմանների, ՀՀ-ից ընտանիքներով արտագաղթողների
ահագնացող թուաքանակի աւելացման առչությամբ: Գրասենեակի
յայտարարութիւնում նշւում է, որ այս ամէնին վերջերս գումարուեցին
առեւտրականների եւ վրացական պետհամարանիշներով աւտոմեքենաների
չհիմնաւորուած մաքսատուրքերի բարձրացումն ու մաքսազերծումը, ինչը
առիթ հանդիսացաւ Վրաստանից ներկրուած աւտոմեքենաների տերերի
արդարացի բողոքի` հանրաքուէի եւ ավտոերթի միջոցով, որը ապօրինաբար
արգելուեց փետրուարի 15-ին ոստիկանութեան կողմից` Գիւմրի-Վանաձոր
տանող ճանապարհին, ոտնահարելով ՀՀ սահմանադրութեան 25-րդ յօդուածը`
ազատ տեղաշարժման քաղաքացու սահմանադրական իրաւունքը:
«ՀԱԿ Գիւմրու տարածքային գրասենեակը դատապարտում է
ավազակապետական ռեժիմի կողմից երկրում բռնապետութեան հաստատումն ու
ռազմա-ոստիկանական մամլիչ մեթոդներով ՀՀ քաղաքացիների իրաւունքների
մասսայական ոտնահարումները, հարկային տեռորը, կամայականութիւնները
հայ ժողովրդի կեղեքումն ու երկրի թալանը: ՀԱԿ-ը սատարում,
անվերապահօրէն պաշտպանում ու աջակցում է բոլոր սոցիալական խմբերին`
իրենց ոտնահարուած իրաւունքների համար պայքարի գործում»,- ասուած է
ՀԱԿ Գիւմրու տարածքային գրասենեակի յայտարարութիւնում: