«ԱԼԻՔ» օրաթերթ 14 փետրւարի 2011 թ. Թ. Հ. թեմի Պատգամաւորական ժողովը 2011 թւականի առաջին իր եռօրեայ նիստերը կը գումարի նախ վաղը՝ փետրւարի 15-ին, ապա մէկշաբաթեայ ընդմիջումից յետոյ՝ երկօրեայ նիստերով՝ փետրւարի 22-ին եւ 23-ին, որը, ինչ խօսք, ակնկալւում է, որ վերատեսութեան ենթարկի իր երկամեայ գործունէութիւնը, ինչպէս նաեւ վերահաստատի տարեկան բիւջէի նախահաշիւը: Մեր ենթադրութիւնը հաստատեց նաեւ Պատգամաւորական ժողովի ատենապետ Գէորգ Աբուլեանը՝ ժխտելով առաջին նիստում նախահաշւի քննարկման մեր նախատեսումը: «Այս նիստին ունենք օրակարգեր, որոնց հետ կապւած՝ պատգամաւորներն ունեն հարցեր: Նրանց առիթ կը տրւի այդ նիստի ընթացքում իրենց հարցերն ուղղելու. հարցեր, որոնք իրենց համար պարզաբանւած չեն եւ եթէ Թեմական խորհուրդը հարկ համարի, կը տայ դրանց լուսաբանութիւններ: Ինչպէս նաեւ կան օրակարգային հարցեր, որոնք մնացել էին նախապէս. դրանցով պէտք է զբաղւենք»: Պրն. Աբուլեանը նշեց նաեւ, որ մէկշաբաթեայ ընդմիջումից յետոյ, այսինքն՝ փետրւարի 22-ին եւ 23-ին արդէն օրէնսդիրը (Պատգ. ժողով) կը զբաղւի նախահաշւի քննարկմամբ. նախահաշիւ, որը, ըստ օրէնսդրութեան, կազմւում է մէկ տարւայ կտրւածքով, Թեմական խորհուրդը 3-4 ամիս յետոյ կաւարտի իր գործունէութեան շրջանը, եւ այս դէպքում՝ Պատգամաւորական ժողովի ատենապետը նշեց, որ ճիշտն այն է, որ մէկ տարւայ նախահաշիւը վաւերացւի, որպէսզի նոր Թեմական խորհուրդը, որը պէտք է մտնի իր աշխատանքային գործընթացի մէջ, արդէն ունենայ վաւերացւած մի նախահաշիւ: Ժողովը արդէն իսկ նախահաշիւը տւել է օրէնսդիրի Տնտեսա-բիւջետային յանձնաժողովին, որից դեռեւս իրենք, ինչպէս նշեց պրն. Աբուլեանը, պատասխաններ եւ տեսակէտներ չեն ստացել: Օրէնսդիրի ատենապետը նաեւ չբացառեց այն պարագան, որ նոր Թեմական խորհուրդը հնարաւոր է, որ լրացումներ եւ փոփոխութիւններ առաջարկի ներկայացւած նախահաշւում: Այդ դէպքում արդէն յստակ չի լինի ասել, որ մէկամեայ նախահաշիւը, որը պէտք է վաւերացւի այս նիստերում, գործադրելի կը լինի նաեւ ապագայ Թեմական խորհրդի կողմից: Պրն. Աբուլեանը բնական համարեց նման փոփոխութիւնները՝ նկատի ունենալով երկրում առգոյ տնտեսական սղաճը: Եւ եթէ վերը նշւած իրողութիւնից ելնելով՝ փոփոխութեան ենթարկւի նախահաշիւը, ապա այդ դէպքում, բնականաբար, այն կը յանձնւի կրկին օրէնսդիրի քննարկմանը՝ հաստատելու նպատակով եւ, բնականաբար, երկրորդ անգամ վաւերացւելու համար: Իսկ մեզ մնում է սպասել եւ հետեւել գործընթացի զարգացումներին, որոնք, վերջիվերջոյ, համապատասխանեցւելու են այն տնտեսական իրավիճակին, որը տիրում է ընդհանուր երկրում: Ա.

---