Նախատեսւում է իրականացնել «Հայերի հետքերը Բրազիլիայում»
խորագրով բազմաբովանդակ մշակոյթային ծրագիր
11-02-2011 18:08:00 | Հայաստան | Հասարակութիւն
ԵՐԵՎԱՆ, 11 ՓԵՏՐՈՒԱՐԻ, ՆՈՅԵԱՆ ՏԱՊԱՆ: ՀՀ սփիւռքի նախարար
Հրանուշ Յակոբեանի եւ Բրազիլիայի արտակարգ եւ լիազօր դեսպան
Մարսելա Նիկոդեմոսի փետրուարի 11-ի հանդիպմանը քննարկուել է
Հայաստանի անկախութեան 20-ամեակին եւ Բրազիլիայի անկախութեան օրուան
նուիրուած «Հայերի հետքերը Բրազիլիայում» խորագրով բազմաբովանդակ
մշակոյթային ծրագրի նախագիծը: Որոշուել է ՀՀ Սփիւռքի նախարարութեան
եւ Հայաստանում Բրազիլիայի դեսպանութեան համատեղ ջանքերով 2011թ.
սեպտեմբերից սկսել ծրագրով նախատեսուած միջոցառումները:
Ինչպէս «ՆՏ»-ին յայտնեցին ՀՀ Սփիւռքի նախարարութեան Մամուլի
եւ հասարակայնութեան հետ կապերի վարչութիւնից, նախագծի գլխաւոր
միջոցառումը ՀՀ Սփիւռքի նախարարութեան եւ ՀՀ-ում Բրազիլիայի
դեսպանութեան կողմից սեպտեմբերի 7-21-ին Հայաստանի Ազգային
պատկերասրահում կազմակերպուելիք «Հայերի հետքերը Բրազիլիայում»
խորագրով ցուցահանդեսն է, որի նպատակն է լուսանկարների եւ
տեսանյութերի միջոցով ներկայացնել հայ ներգաղթածների պատմութիւնը
Բրազիլիայում: Նախատեսւում է նաեւ կազմակերպել «Բրազիլական
հասարակութեան զարգացման գործում հայկական Սփիւռքի ներդրումը»
թեմայով գիտաժողով` ակնառու բրազիլահայերի մասնակցութեամբ:
Ծրագրւում է Բրազիլիայում հայերի ներգաղթի եւ ինտեգրման մասին գրքի
հրատարակում: Նախատեսւում է հոկտեմբերին կազմակերպել համերգներ`
նուիրուած բրազիլահայ կոմպոզիտոր Ռիկարդո Տակուշյանի, կիթառահար Ժոան
Կույումջյանի ստեղծագործություններին:
Հ.Յակոբեանը նշել է, որ ծրագիրը Հայաստանի եւ Բրազիլիայի
Հանրապետութիւնների քաղաքական, մշակոյթային համագործակցութեան եւ
բարեկամութեան մի նոր դրսեւորում է: Նա առաջարկել է նաեւ
նկարահանել «Հայերի հետքերը Բրազիլիայում» վերնագրով ֆիլմ: