ԵՐԵՒԱՆ, 29 ՀՈԿՏԵՄԲԵՐԻ, ՆՈՅԵԱՆ ՏԱՊԱՆ: Հայաստանի Ազգային անվտանգութեան ծառայութեան եւ Հայաստանում ՌԴ Դաշնային անվտանգութեան ծառայութեան սահմանապահ վարչութեան կողմից ձեռնարկուած միջոցառումներով չէն հաստատուել «Հզօր Թուրքիայ» կուսակցութեան նախագահ Թունայ Բեքլեւիչի եւ փոխնախագահ Բայբարս Օրսեկի կողմից արուած յայտարարութիւնները հայ-թուրքական սահմանը անօրինական հատելու մասին։ Այս մասին հոկտեմբերի 29-ին «ՆՈՅԵԱՆ ՏԱՊԱՆ»-ին յայտնեցին ՀՀ ԱԱԾ մամուլի կենտրոնից։ Հոկտեմբերի 28-ին Թունայ Բեքլեւիչը եւ Բայբարս Օրսեկը օրինական ճանապարհով, Բագրատաշենի անցակէտով, ժամանել էն Հայաստան եւ յաջորդ օրը, «Հայեացք» մամուլի ակումբում տեղի ունեցած ասուլիսի ընթացքում, Բեքլեւիչը վերահաստատել է, որ իրենք հոկտեմբերի 11-ին ոտքով հատել էն հայ-թուրքական սահմանը՝ նպատակ ունենալով իշխանութիւնների ուշադրութիւնը հրաւիրել հայ-թուրքական սահմանի բացման խնդրին: Վերոյիշեալ յայտարարութիւնների առնչութեամբ պարզաբանումներ ստանալու համար հոկտեմբերի 29-ին Թ. Բեքլեւիչը եւ Բ. Օրսեկը հրաւիրուել էն ՀՀ Ազգային անվտանգութեան ծառայութեան վարչական շէնք, ուր հայ- թուրքական սահմանը հատելու վերաբերեալ որեւէ հիմնաւոր փաստարկ չէն կարողացել ներկայացնել: Թ. Բեքլեւիչը եւ Բ. Օրսեկը նախազգուշացուել էն, որ նման վարքագիծը եւ անպատասխանատու յայտարարութիւններն անընդունելի էն, եւ նրանց առաջարկուել է լքել Հայաստանի տարածքը:

---