ԴԻԼԻՋԱՆ, 5 ՄԱՐՏԻ, ՆՈՅԵԱՆ ՏԱՊԱՆ: Դիլիջանում մարտի 5-ին
բացուեց «Ամերիա»
բանկի մասնաճիւղը:
Մասնաճիւղի բացմանը ներկայ էին ՀՀ Կենտրոնական բանկի նախագահ
Արթուր Ջաւադեանը, բանկի խորհրդի նախագահ Ռուբէն Վարդանեանը,
Տաւուշի մարզպետ Արմէն Ղուլարեանը, պաշտօնատար այլ անձիք:
Ինչպէս լրագրողների հետ զրոյցում նշեց ռուսաստանաբնակ հայ
գործարար, «Տրոյկա Դիալոգ»-ի հիմնադիր եւ հիմնական բաժնետէր,
«Ամերիա» բանկի խորհրդի նախագահ Ռուբէն Վարդանեանը, Տաւուշի մարզը
տուրիզմի, առողջապահութեան, բանկային համակարգի զարգացման մեծ
հեռանկարներ ունի: Կարեւորելով Հայաստանում բանկային համակարգի
ընդլայնումը, նա ընդգծեց, որ այն հնարաւորութիւն է ընձեռում
մարզերի բնակչութեանը եւս առաջարկել բարձր մակարդակի բանկային
ծառայութիւններ:
Բանկի Մանրածախ գործառնութիւնների գծով տնօրէն Վազրիկ
Սեկոյանը յայտնեց, որ բիզնես-պլանով նախատեսւում է առաջիկայում մօտ
15 մլն դոլարի վարկային գումարներ ունենալ Դիլիջանի մասնաճիւղում:
ԿԲ-ի նախագահ Արթուր Ջաւադեանը յայտնեց, որ Դիլիջանում արդէն
իրենց մասնաճյուղերն ունեն Հայաստանի երեք առաջատար բանկեր:
«Բանկային համակարգում աշխուժացում կայ: Շուտով Դիլիջանում կբացուի
եւս մէկ բանկի մասնաճիւղ, եւս երեքն էլ արդէն յայտեր են
ներկայացրել մասնաճիւղերի բացման համար»,- ասաց Ա.Ջաւադեանը:
«Ամերիա» բանկի տնօրինության նախագահ-գլխաւոր տնօրէն Արտակ
Հանեսյանի խօսքերով, յատկանշական է, որ բանկի 4-րդ մասնաճիւղը
բացւում է Դիլիջանում, քանի որ դրանով նպատակ ունեն խթանելու
Դիլիջանի զարգացմանը: «Մենք շատ ակտիւ ենք լինելու այս
տարածաշրջանում թէ' վարկաւորման, թէ' յաճախորդների ներգրաւման
առումով: Մեր հիմնական ուղղութիւնները կլինեն զբօսաշրջութեան,
վերամշակող արտադրութեան եւ ծառայութիւնների զարգացումը»,- նշեց
Ա.Հանեսյանը: Ըստ նրա, թէեւ 2-3 տարում հնարաւոր չէ Դիլիջանը
դարձնել ֆինանսական կենտրոն, բայց դա շատ լուրջ ծրագիր է, որ պէտք
է մշակուի պետական մակարդակով:
Ա.Ղուլարյանն ընդգծեց, որ քայլ առ քայլ իրագործւում է ՀՀ
կառավարութեան որդեգրած` մարզերի համաչափ զարգացման
քաղաքականութիւնը, մասնաւորապէս Դիլիջանը ֆինանսական կենտրոն
դարձնելու ծրագիրը: Մարզպետը հոյս յայտնեց, որ Դիլիջանի
զարգացմանը զուգահեռ հնարաւոր կլինի զարգացնել նաեւ մարզի միւս
տարածքները, խթանել մարզի փոքր եւ միջին բիզնեսի զարգացմանը:
Նշենք, որ անցած տարի «Ամերիա» բանկը 3 մասնաճիւղ է բացել`
Երեւանում, Քաջարանում եւ Լեռնային Ղարաբաղում: Այս տարի
նախատեսւում է բացել եւս երկուսը` Երեւանում եւ Գիւմրիում: