«Փառք եմ տալիս Աստծուն, որ այսօրուայ մեր եկեղեցական դասը գոհունակութեան առիթ է ընձեռում մեզ` իր ծառայանուիրումով, իր գիտակից գործունէութեամբ եւ կեանքով». Գարեգին Բ Կաթողիկոս

 

 

Փետրուարի 10-ին Հայաստանեայց Առաքելական Սուրբ Եկեղեցին տօնում է Սրբոց Ղեւոնդեանց քահանաների տօնը: Այս առիթով Մայր Աթոռ Սուրբ Էջմիածնի Գեւորգեան հոգեւոր ճեմարանի հանդիսութիւնների դահլիճում, բարձր նախագահութեամբ Ն.Ս.Օ.Տ.Տ. Գարեգին Բ Ծայրագոյն Պատրիարք եւ Ամենայն Հայոց Կաթողիկոսի տեղի ունեցաւ Հայոց Եկեղեցու թեմերում եւ կառոյցներում սպասաւորող քահանաների պարգեւաբաշխման հանդիսաւոր արարողութիւն: 

Սրբոց Ղեւոնդեանց տօնի ոգեկոչման կապակցութեամբ հոգեւոր դասին ողջունեց Շիրակի թեմի առաջնորդ Գերաշնորհ Տ. Միքայէլ եպիսկոպոս Աջապահեանը: Շնորհաւորելով քահանայից ողջ դասին` Միքայէլ Սրբազանը մասնաւորաբար ընդգծեց նրանց բերած արդիւնաշատ ծառայութեան կարեւորութիւնը Հայ Եկեղեցու կեանքում: Սրբազան Հայրը մեծ ուրախութեամբ փաստեց նաեւ այն պարագան, որ հաւաքին մէկտեղուած են Հայ Եկեղեցու աշխարհասփիւռ տարբեր թեմերից Մայր Աթոռ ժամանած շուրջ 240 քահանաներ:

 Այնուհետեւ տեղի ունեցաւ պարգեւաբաշխութիւնը: Ծաղկեայ փիլօն կրելու իրաւունք ստացան Մայր Աթոռ Ս. Էջմիածնից Տ. Ադամ քահանայ Մակարեանը եւ Տ. Ասողիկ քահանայ Կարապետեանը, Արագածոտնի թեմից Տ. Զօրայր քահանայ Կարապետեանը եւ Տ. Ղեւոնդ քահանայ Գափոյեանը, Գեղարքունեաց թեմից Տ. Գնել քահանայ Մարտիրոսեանը, Կենտրոնական Եւրոպայի հայրապետական պատուիրակութիւնից Տ. Նորայր քահանայ Գեանջումեանը,  Ռուսաստանի եւ Նոր Նախիջեւանի թեմից Տ. Յակոբ քահանայ Սարոյեանը, Տ. Պօղոս քահանայ Տէրտէրեանը, Տ. Թադէոս քահանայ Հայբարեանը, Տ. Տիրան քահանայ Աւագեանը,  Տ. Գառնիկ քահանայ Լոռեցեանը, Տ. Սարգիս քահանայ Չօփուրյանը, Տ. Մաղաքիայ քահանայ Օհանեանը, Տ. Գեւորգ քահանայ Վարդանեանը: 

Լանջախաչ կրելու իրաւունք ստացան Մայր Աթոռ Ս. Էջմիածնից Տ. Արսէն քահանայ Միրզոյեանը եւ Տ. Ոսկան քահանայ Յովհաննիսեանը, Արարատեան Հայրապետական թեմից Տ. Դաւիթ քահանայ Սահակեանը, Ռուսաստանի եւ Նոր Նախիջեւանի թեմից Տ. Գրիգոր քահանայ Բեկնազարեանը եւ Տ. Ներսէս քահանայ Խանանեանը:

Հաւարտ հայրապետական պարգեւաբաշխումների, իր գնահատանքի եւ օրհնութեան խօսքով հանդէս եկաւ Ամենայն Հայոց Կաթողիկոսը` շնորհաւորելով Մայր Աթոռ ժամանած քահանայ հայրերին Ղեւոնդեանց տօնի առիթով եւ գոհաբանական աղօթք բարձրացնելով առ Աստուած եկեղեցական անդաստանում հոգեւորականաց ներդրած ջանքերն արդիւնաւորելու համար:

«Ցանկանում ենք առաջին հերթին մեր գնահատանքի խօսքը բերել մեր քահանայից դասին, ովքեր նուիրումով եւ յանձնառութեամբ իրենց ծառայութիւնն են մատուցում եկեղեցական անդաստանում եւ ամէն կերպ ջանում բաւարարելու հոգեւոր պահանջները հաւատաւոր մեր զաւակների: Մենք գիտենք, որ բազում դժուարութիւնների առջեւ է մեր Սուրբ Եկեղեցին, տակաւին կան շատ խնդիրներ, որոնք յաղթահարուած չեն, տակաւին կան շատ բացեր, որոնք նոյնպէս խոչընդոտում են լիարժէք կերպով արդիւնաւորելու մեր առաքելութիւնը մեր ժողովրդի կեանքից ներս: Բայց, փառք Աստծոյ, այս տարիների ընթացքին մենք ունեցել ենք բաւականին առաջընթաց, բաւականին հարցեր, խնդիրներ ստացել են լուծումներ: Առաւել ուրախալի է, որ համալրուել է եկեղեցականաց դասը: Եթէ 2000 թ. մենք ունէինք ընդամէնը 70-80 քահանաներ, փառք Աստծոյ, այսօր արդէն 240-ից աւելի եկեղեցականներ միայն համախմբուել են Մայր Աթոռ Սուրբ Էջմիածնում: Եւ փառք ենք տալիս Աստծուն, որ ամէն տարի նոր սպասաւորներ գալիս են համալրելու մեր եկեղեցականաց շարքերը»,- ասաց Նորին Սրբութիւնը: 

Ամենայն Հայոց Հայրապետն իր խօսքում անդրադարձաւ նաեւ հոգեւորականի կերպարին` մասնաւորապէս նշելով. «Ղեւոնդեանց քահանայից տօնը գեղեցիկ առիթ է, որպէսզի մէկ անգամ եւս իւրաքանչիւրս անդրադարձ կատարենք մեր կոչմանը, մեր առաքելութեանը, քննենք մեր անձերը եւ տեսնենք, թէ մենք իրապէ՞ս կանգնած ենք այն ուղու, այն ճանապարհի վրայ, որ մեզ համար գծել են մեր հայրերը` Ղեւոնդեանց քահանայք: Եւ եթէ մենք նրանց ուղենշած ընթացքով առաջնորդւում ենք եւ արժանի ենք նոյն շնորհը կրելու` անբիծ, անարատ պահելով նրանց կերտած բարի անունը, համբաւը, փառքը հայ եկեղեցականի: 

 Անշուշտ, շնորհընկալ եկեղեցականաց դասը նոյնպէս զերծ չէ մարդկային տկարութիւններից, մեղանչումից, բայց առաւել պատասխանատուութիւն կայ ծանրացած մեր ուսերի վրայ, եւ մենք մշտապէս պիտի քննենք մեր անձերը, անդրադառնանք մշտապէս մեր կեանքին, մեր գործին, մեր վարքին, բարքին, ընթացքին: Եւ եթէ ինքներս կարող ենք տեսնել այն թերութիւնները, անմիջապէս եւեթ  նախանձախնդրօրէն ձեռնամուխ լինենք այդ թերութիւնների վերացմանը: Կամ եթէ մեր ուշադրութեան կը բերեն մեր եղբայրները որոշակի հարցեր, որոնք մեր անձերի կողմից դրսեւորուած թերացման արդիւնք են, նոյնպէս անյապաղ սրբագրել, քանի որ իւրաքանչիւրիս անձը ներամփոփում է իր մէջ ամբողջ Եկեղեցին: 

 Մեր անձով բարձրանում է Եկեղեցին, եւ մեր անձով նաեւ ստուերւում են Եկեղեցու բարի համբաւն ու անունը: Եւ մենք իւրաքանչիւրս առաւել չափով բծախնդիր եւ նախանձախնդիր պիտի լինենք անթերի կեանքի ընթացք ունենալու եւ անթերի իրականացնելու հոգեւոր մեր առաքելութիւնը»: 

Խօսելով Հայոց Եկեղեցու հասցէին հնչող մեղադրանքների, տարբեր կառոյցների, կազմակերպութիւնների եւ անձանց կողմից Եկեղեցու նկատմամբ դրսեւորուող անհանդուրժողական վերաբերմունքի մասին` Վեհափառ Հայրապետը եկեղեցականներին յորդորեց այս ամէնի լոյսի ներքոյ առաւել նախանձախնդիր լինել իրենց ծառայութեան մէջ, որպէսզի տեղ չգտնեն այնպիսի արարքներ, որոնց թիւր մեկնաբանութեան հետեւանքով կարող են հարուածել Եկեղեցու հեղինակութեանն ու բարի անուանը:

«Այս տարին կարեւոր, նշանակալի տարի է մեր ժողովրդի կեանքում: Մենք ոգեկոչում ենք 100-ամեակը Հայոց ցեղասպանութեան: Եւ այս իրողութիւնը նոյնպէս պիտի ոգեշնչի մեզ, որպէսզի առաւել արդիւնաւոր կերպով մենք մեր ծառայութիւնն իրականացնենք ազգային մեր կեանքի մէջ, համախումբ պահենք մեր ժողովրդին, սէրը առատացնենք նրանց մէջ, անհանդուրժողութեան ոգին դուրս վանենք մեր կեանքից, արատաւոր երեւոյթները նոյնպէս, որոնք խոչընդոտում են լիարժէք առաջընթացը մեր կեանքի, պատճառ են հադիսանում, որ մեր զաւակունք յաճախ նաեւ թողնեն հայրենի մեր երկիրը: Այս առումով մենք` իբրեւ եկեղեցականներ, պատասխանատու, լուրջ աշխատանք ունենք իրականացնելու: Եւ իմ աղօթքն է, որ Տէրը զօրացնի մեզ ամէնքիս` մեր առաքելութիւնը, մեր ծառայութիւնը ամբողջական, անթերի կերպով կատարելու ազգային մեր կեանքում եւ նպաստելու, որ մեր Եկեղեցու անունն ու պատիւը միշտ բարձր լինի, եւ յարգանքը առատանայ աւելիով մեր հոգեւորականաց նկատմամբ», - յաւելեց Ամենայն Հայոց Կաթողիկոսը: 

Հայցելով Տիրոջ օրհնութիւնն ու օգնականութիւնը ամէնքին` Հայոց Հովուապետը նաեւ իր գնահատանքը բերեց թեմակալ առաջնորդներին, ովքեր ամենայն ջանք են ի գործ դնում, որպէսզի Եկեղեցին իր առաքելութեան մէջ առաւել զօրանայ, շարունակի լինել ժողովրդի յոյսն ու ապաւէնը: 

Արարողութիւնն եզրափակուեց Հայրապետի «Պահպանիչ» աղօթքով:

 

 

  -   Հասարակութիւն