ՎԶԵԲ-ի մասնագէտները Հայաստանի համար 2010թ.-ին կանխատեսում
են 2 տոկոսանոց տնտեսական աճ
16-02-2010 20:50:00 | Հայաստան | Տնտեսութիւն
ԵՐԵՎԱՆ, 16 ՓԵՏՐՈՒԱՐԻ, ՆՈՅԵԱՆ ՏԱՊԱՆ: Վերակառուցման եւ
զարգացման եւրոպական բանկի մասնագէտները անցումային փուլում գտնուող
երկրների համար 2010թ.-ին միջինը 3,3 տոկոս տնտեսական աճ են
կանխատեսում: Ինչպէս փետրուարի 16-ի ասուլիսում նշեց ՎԶԵԲ-ի գլխաւոր
տնտեսագէտ Ելենա Շվեյգերը, Հայաստանի համար կանխատեսւում է մօտ 2
տոկոսանոց տնտեսական աճ: Ըստ նրա, դանդաղ կվերականգնուի
շինարարութեան ոլորտը, հայկական արտադրանքի նկատմամբ պահանջարկի
մեծացմամբ պայմանաւորուած կարձանագրվի արտահանման աճ:
Ե.Շվեյգերի խօսքերով, երկրի բանկային համակարգի շնորհիւ
համաշխարհային ֆինանսատնտեսական ճգնաժամի առաջին փուլը չի հարուածել
Հայաստանին, սակայն ճգնաժամի բացասական հետեւանքները յետագայում են
զգացվել: Ըստ նրա, տնտեսութեան հիմնական աճն ապահովող
շինարարութեան ոլորտում արձանագրուել է 36,4 տոկոս անկում, կտրուկ
նուազեցին մասնաւոր տրանսֆերտները:
Ե.Շվեյգերը նշեց նաեւ, որ տարածաշրջանի երկրներում տնտեսական
միջին անկումը կազմել է 6,1 տոկոս: Ըստ նրա, Հայաստանն այն 5
երկրների թւում է, որտեղ երկնիշ անկում է արձանագրուել:
ՎԶԵԲ-ի ներկայացուցիչ Ֆրեկլին Սթիվզի խօսքերով, ճգնաժամի
պայմաններում անցումային փուլում գտնուող երկրներում բարեփոխումներ
իրականացնելն աւելի դժուվար եղավ, քանի որ հիմնականում տուժեց
բարեփոխումների շարժառիթ հանդիսացող միջին խաւը, բարձրացաւ
գործազրկութեան մակարդակը:
Մասնագէտների կարծիքով, ճգնաժամը յաղթահարելու լաւագոյն
միջոցը բիզնես միջավայրի բարելաւումն է, ինչը պէտք է իրականացուի
կառավարութեան ջանքերով: Ըստ նրանց, չնայած Հայաստանի արտաքին
պարտքի միջոցների մեծ մասն արտօնեալ է, սակայն 2013թ.-ից պարտքի
մարման խնդիր կառաջանայ: Ըստ ՎԶԵԲ-ի, արտաքին պարտքի պատշաճ
սպասարկման ճանապարհներից է երկրում տնտեսական աճի ապահովումը: