Ռոմանիոյ Ուղղափառ Եկեղեցու հովուապետ Դանիէլ Պատրարքն ընդունեց Հայաստանի դեսպանին
30-11-2010 14:11:35 | Հայաստան | Հասարակութիւն
Նոյեմբերի 29-ին Ռոմանիոյ Ուղղափառ Եկեղեցու հովուապետ Նորին Երանելիութիւն Դանիէլ Պատրիարքն (His Beatitude Daniel, Patriarch of the Romanian Orthodox Church) ընդունեց Հայաստանի դեսպան Համլէտ Գասպարեանին: Ջերմ եւ բովանդակալից զրոյցի ընթացքում շօշափուեցին երկու ժողովուրդների եւ երկրների աւանդական բարեկամական կապերն առաւել խորացնելու եւ ամրացնելու հարցեր: Ընդգծուեց, որ դրա համար նպաստաւոր պայմաններ էն ընձեռնում հայ-ռումինական բազմադարեայ առնչութիւնները, ինչպէս նաեւ տարբեր բնագաւառներում ներկայումս ծաւալուող միջպետական համագործակցութեան ծրագրերը: Ն.Է. Դանիէլ Պատրիարքն իր հերթին պատրաստակամութիւն յայտնեց հոգեւոր ոլորտում խթանելու մի շարք ծրագրեր, մասնաւորապէս հոգեւոր կրթութեան եւ դաստիարակութեան բնագաւառում` առանձնայատուկ ուշադրութիւն դարձնելով փոխադարձաբար հայերէնի ու ռումիներէնի խորացուած ուսուցմանը եւ մասնագէտ կադրերի պատրաստմանը:
Բարձր գնահատելով Ռումինիայի կառավարութեան եւ եկեղեցու մշտական հոգատարութիւնն ու աջակցութիւնը մասնաւորապէս Ռումինահայոց պատմամշակութային հարուստ ժառանգութեան պահպանման եւ զարգացման գործում`ընդգծուեց այդ համատեղ ժառանգութեան գիտական գնահատման եւ լայն հասարակութեանը դրա պատշաճ ներկայացման կարեւորութիւնը, որպէս եւրոպական տարածքում մշակութային բազմազանութեան լաւագոյն դրսեւորումներից մէկը:
Հանդիպման ընթացքում դեսպան Գասպարեանը ռումին Պատրիարքին տեղեկացրեց Հայաստանի եւ հայ-ռումինական յարաբերութիւնների ներկայ վիճակի մասին: Հանդիպումից յետոյ Հայաստանի դեսպանը կարճ հաղորդումով հանդէս եկաւ մամուլի առջեւ: