ԵՐԵՒԱՆ, 25 ՆՈՅԵՄԲԵՐԻ, ՆՈՅԵԱՆ ՏԱՊԱՆ: Նոյեմբերի 24-ին Նախագահ Սերժ Սարգսեանը ստորագրել է Ազգային Ժողովի ընդունած «Ժամանակաւոր անաշխատունակութեան նպաստների մասին», «Պարտադիր սոցիալական ապահովութեան վճարների մասին» ՀՀ օրէնքում փոփոխութիւններ եւ լրացումներ կատարելու մասին, «Եկամտահարկի մասին» ՀՀ օրէնքում փոփոխութիւն կատարելու մասին օրէնքները: Ըստ այդմ, դեկտեմբերի 1-ից ուժի մէջ մտնող յիշեալ օրէնքներով կը գործեն ժամանակաւոր անաշխատունակութեան` հիւանդութեան, պրոթեզաւորման, առողջարանային բուժման, յղիութեան ու ծննդաբերութեան, ընտանիքի հիւանդ անդամի խնամքի, նպաuտների հաշուարկման եւ վճարման վերանայուած կարգն ու սկզբունքները: Մասնաւորապէս, բացառութեամբ յղիութեան եւ ծննդաբերութեան նպաստի, վարձու աշխատողի նպաuտը ժամանակաւոր անաշխատունակութեան առաջին աշխատանքային օրուայ համար չի վճարուի, դրան յաջորդող երեք աշխատանքային օրուայ համար կը վճարուի գործատուի միջոցների հաշուին, եւ այդ գումարը գործատուին չի փոխհատուցուի, իսկ նպաստի մնացած մասը` ՀՀ պետական բիւջէի միջոցների հաշուին: Ներկայումս գործատուն, վարձու աշխատողների ժամանակաւոր անաշխատունակութեան թերթիկի հիման վրայ, սոցիալական վճարների հաշուին վճարում է ժամանակաւոր անաշխատունակութեան նպաստ եւ յետագայում հաշուանցում կատարում պետական բիւջէ փոխանցուող սոցիալական վճարներից: Յաջորդ էական փոփոխութիւնը վերաբերում է յղիութեան եւ ծննդաբերութեան նպաստին: Այս դէպքում պետութիւնը, թէեւ վարձու աշխատողի նպաuտը կը վճարի ժամանակաւոր անաշխատունակութեան առաջին աշխատանքային օրուանից սկսած, սակայն, եթէ սահմանուած կարգով հաշուարկուած միջին ամuական աշխատավարձի (եկամտի) չափը գերազանցի «Նուազագոյն ամuական աշխատավարձի մաuին» oրենքով uահմանուած չափի հնգապատիկը, ապա նպաստը կը հաշուարկուի նուազագոյն ամuական աշխատավարձի հնգապատիկից: 2010թ.-ի դեկտեմբերին նուազագոյն ամuական աշխատավարձի չափը սահմանուած է 30 հազար դրամ, իսկ 2011թ.-ի յունուարի 1-ից` 32,5 հազար դրամ: Բացի այդ, վարձու աշխատողին յղիութեան ու ծննդաբերութեան նպաստը տրուելու է ՀՀ աշխատանքային օրէնսգրքով սահմանուած` յղիութեան եւ ծննդաբերութեան արձակուրդի ժամանակաշրջանի բոլոր աշխատանքային օրերի համար: Գործող օրէնքով նպաստը տրւում է արձակուրդի ժամանակաշրջանի օրացուցային օրերի համար: Այս փոփոխութիւններն առաջացրել էն յատկապէս ապագայ մայրերի դժգոհութիւնը: Նոյեմբերի 24-ին կանայք ՀՀ նախագահի նստավայրի դիմաց պարզել էին «Պարոն նախագահ, ե'տ կանչէք Ձեր ստորագրութիւնը», «Ամո'թ, բիւջէն լցնում էն հայ մայրիկների հաշուին», «Ո'չ ժամանակաւոր անաշխատունակութեան մասին ՀՀ օրէնքի փոփոխութեանը» եւ նմանատիպ այլ ցուցապաստառներ` փորձելով իրենց պահանջները հասցնել նախագահին: Ցոյցի մասնակիցները վճռակամ էին իրենց պահանջին հետամուտ լինելու հարցում:

---