Կառավարութեան նախաձեռնութեամբ յունիսի 21-ին հրաւիրուած Ազգային ժողովի արտահերթ նստաշրջանի օրակարգում, ի թիւս այլ հարցերի, ընդգրկուած է նաեւ «Աղբահանութեան եւ սանիտարական մաքրման մասին» օրէնքի նախագիծը եւ դրանից բխող մի շարք գործող օրէնքներում լրացումների եւ փոփոխութիւնների փաթեթը: Ըստ այդմ, մասնաւորապէս, առաջարկում է վերանայել աղբահանութեան վճարների հաշուարկման կարգը եւ դրոյքաչափերը: Յիշեցնենք, որ ԱԺ-ի 2010թ.-ի դեկտեմբերի 17-ի արտահերթ նիստում երկրորդ ընթերցմամբ նոյնանուն փաթեթի քուէարկութիւնը տապալուեց: Կառավարութեան օրէնսդրական այս վիճահարոյց նախաձեռնութեան հիմնական ընդդիմախօսները` ՀՅԴ եւ «Ժառանգութիւն» խմբակցութիւնները, քուէարկութիւնը բօյկօտեցին: Արդիւնքում, քուէարկութեանը չմասնակցեցին անհրաժեշտ թուով` առնուազն 66 պատգամաւորներ, ուստի քուէարկութիւնը համարուեց չկայացած: ՀՀԿ խմբակցութիւնը` պատճառաբանելով քուէարկութեան ժամանակ տեխնիկական վրիպակի առկայութիւնը, առաջարկեց քուէարկութիւնը կրկնել, սակայն վերաքուէարկութեան արդիւնքում պատկերը չփոխուեց: Այս անգամ ներկայացուելիք օրէնսդրական փաթեթը մասնակի փոփոխութիւններ է կրել: Մասնաւորապէս, առաջարկւում է աղբահանութեան վճարը կենցաղային աղբի համար սահմանել ըստ հասցէի հաշուառում ունեցող իւրաքանչիւր բնակչի համար՝ առաւելագոյնը ամսական 400 դրամ (շուրջ 1.07 ԱՄՆ դոլար), կամ ըստ բնակելի շինութեան կամ բնակարանի ընդհանուր մակերեսի՝ մէկ քառակուսի մետր մակերեսի համար առաւելագոյնը 25 դրամ: Դեկտեմբերին տապալուած նախագծով նախատեսուած էր համապատասխանաբար 500 դրամ եւ 50 դրամ: Ոչ կենցաղային աղբի համար առաջարկւում էն հետեւեալ մօտեցումները. ըստ ծաւալի հաշուարկման դէպքում մէկ խորանարդ մետր աղբի համար սահմանել առաւելագոյնը 1 700 դրամ, կամ ըստ զանգուածի՝ մէկ տոննա աղբի համար՝ առաւելագոյնը 5 000 դրամ, կամ ըստ ոչ բնակելի շինութեան զբաղեցրած մակերեսի՝ 1 քմ մակերեսի հաշուով առաւելագոյնը 250 դրամ: Խոշոր եզրաչափի աղբի համար ըստ դրա տեղափոխման համար նախատեսուած յատուկ կոնտեյներների քանակի՝ իւրաքանչիւր կոնտեյների համար նախատեսւում է սահմանել առաւելագոյնը 10 000 դրամ: Նախատեսւում է, որ աղբահանութեան վճար սահմանելու համար կիրառուող մեթոդները եւ աղբահանութեան վճարի դրոյքաչափերը իւրաքանչիւր համայնքի համար սահմանուելու էն տուեալ համայնքի աւագանու կողմից` օրէնքով ամրագրուած դրոյքաչափերի սահմաններում: Աղբի տարբեր տեսակների համար կարող էն սահմանուել տարբեր դրոյքաչափեր: Ընդ որում, նախագծի համաձայն, տարբեր դրուքաչափեր սահմանելիս կարող էն հաշուի առնուել նաեւ անշարժ գոյքի չափերը, նպատակային կամ գործառնական նշանակութիւնը, հարկայնութիւնը, հեռաւորութիւնը աղբավայրից, աղբահանութեան վճար վճարողների եւ նրանց գործունէութեան առանձնայատկութիւնները: Նշենք, որ ներկայումս աղբահանութեան վճարը գանձւում է ըստ հասցէի հաշուառում ունեցող իւրաքանչիւր բնակչի` առաւելագոյնը ամսական 200 դրամի չափով: Դեռեւս անցած տարուայ դեկտեմբերին կառավարութեան ներկայացուցիչը խորհրդարանում յայտարարել էր, որ «որակեալ աղբահանութիւն իրականացնելու դէպքում» աղբահանութեան վճարը մէկ շնչի հաշուարկով կը կազմի 485 դրամ:

---