Գուրգէն Մխիթարեան. «Ամենակարեւոր խնդիրը վիրահայութեան
ազգային ինքնագիտակցութեան բարձրացումն է»
27-01-2010 14:38:00 | Հայաստան | Հասարակութիւն
ԵՐԵՎԱՆ, 27 ՅՈՒՆՎԱՐԻ, ՆՈՅԵԱՆ ՏԱՊԱՆ: Մէկ տարի է, ինչ
Թբիլիսիում, որտեղ ներկայումս բնակւում են շուրջ 120 հազար հայեր,
հրատարակւում է «Պարագա» հայագիտական ուսումնաթերթը: Այն լոյս է
տեսնում ամիսը մէկ անգամ` 30-50 էջ ծաւալով եւ 500-1000
տպաքանակով: Ինչպէս «ՆՈՅԵԱՆ ՏԱՊԱՆ»-ի թղթակցին յայտնեց թերթի
հիմնադիր տնօրէն եւ գլխաւոր խմբագիր Գուրգէն Մխիթարեանը, երկլեզու`
հայերէն եւ ռուսերէն, ամսաթերթի նպատակն է մօտեցնել վիրահայերին
իրենց պատմական ակունքներին, ծանօթացնել հայ ժողովրդի յայտնի
դէմքերի հետ, որոնց մէջ քիչ չեն նաեւ թիֆլիսահայերը:
Ամսաթերթի «Հայոց պատմութիւն» բաժնում զետեղվում են
պատմա-վաւերագրական նիւթեր, իսկ բաժնի համար յօդուածներ է
տրամադրում նաեւ Հայաստանի Գիտութիւնների ազգային ակադեմիայի
Պատմութեան ինստիտուտը: Ըստ Գ.Մխիթարեանի, նախատեսւում է բացել
յատուկ հայ մշակոյթին վերաբերող բաժին, որտեղ հիմնական շեշտը պէտք
է դրուի վիրահայութեան մշակոյթի ներկայացման վրայ: Անհրաժեշտ է
բացել նաեւ բաժին, որտեղ կներկայացուեն Հայ Առաքելական եկեղեցու,
հայոց հաւատքի ճիշտ հիմքերը, այդ թւում հայկական եկեղեցական
տոները: Նշուեց, որ ռուսախոս վիրահայերի համար ամսաթերթում կայ
ռուսերէն լեզւով հայոց լեզուի ուսուցման բաժին:
Գ.Մխիթարեանի կարծիքով, ամենակարեւոր խնդիրն է բարձրացնել
վիրահայութեան ազգային ինքնագիտակցությունը: Ըստ նրա, այսօր
Վրաստանում կան բոլոր նախապայմանները, որպէսզի հայերը կարողանան
պահպանել իրենց ազգային ինքնութիւնը, սակայն հայկական համայնքը
կազմակերպուած չէ եւ գտնւում է լճացման վիճակում: Համայնքի հիմքերի
խարխլման հարցում բացասական դեր է խաղացել հայերի արտագաղթը
Ռուսաստան, Գերմանիա, եւրոպական այլ երկրներ, նաեւ Հայաստան, նաեւ
տեղի հայկական դպրոցների ուսուցիչների պատրաստուածութեան ցածր
մակարդակը: Վիրահայութեան ազգային ինքնութեան պահպանման հարցում
Գ.Մխիթարեանը կարեւորեց հայաստանեան երեք հեռուստաալիքների`
Հանրայինի, «Շանթի» եւ «Արմէնիայի», հաղորդումների արբանեակային
հեռարձակումը: