ԵՐԵՎԱՆ, 26 ՀՈԿՏԵՄԲԵՐԻ, ՆՈՅԵԱՆ ՏԱՊԱՆ: Հոկտեմբերի 26-ին տեղի ունեցաւ «Աջակցութիւն Հայաստանի Մարդու իրաւունքների պաշտպանի գրասենեակին» խորագրով Թվինինգ ծրագրի մեկնարկի պաշտօնական արարողութիւնը: 18-ամսեայ ծրագիրն իրականացուելու է Հայաստանի Մարդու իրաւունքների պաշտպանի եւ Ֆրանսիայի ու Իսպանիայի Օմբուդսմանների գրասենեակների միջեւ ձեռքբերուած պայամանավորվածության համաձայն: Ինչպէս հանդիսաւոր արարողութեանը նշեց Հայաստանի Մարդու իրաւունքների պաշտպան Արմէն Յարութիւնեյանը, ծրագրի շրջանակներում մշտապէս Հայաստանում է գտնուելու Իսպանիայի եւ Ֆրանսիայի օմբուդսմանների գրասենեակների փորձագետներից կազմուած խումբը, որն իր օգնութիւնն է ցոյց տալու Հայաստանի մարդու իրաւունքների պաշտպանի գրասենեակին: Այն հիմնականում ցուցաբերվելու է երեք ուղղութիւններով` ինստիտուցիոնալ, մարդկային ռեսուրսների ուսումնասիրութիւն եւ իրազեկության բարձրացում: Հայաստանում Եւրոպական յանձնաժողովի պատուիրակութեան ղեկավար Ռաուլ դե Լյուցենբերգերը նշեց, որ ծրագրի նպատակն է ուժեղացնել Հայաստանում Մարդու իրաւունքների պաշտպանի ինստիտուտը, ինչը այդ ինստիտուտի եւ մարդու իրաւունքների պաշտպանութեան բարձրացման կարեւորութեան եւս մէկ օրինակ է: Հայաստանում Ֆրանսիայի արտակարգ եւ լիազօր դեսպան Սերժ Սմեսոֆֆը գոհունակութիւն յայտնեց, որ Հայաստանում առաջին Թվինինգ ծրագիրն ուղղուած է Մարդու իրաւունքների պաշտպանի գրասենեակին: «Հայաստանը նմանատիպ ինստիտուտ ստեղծելով բաւականին հավակնոտ եւ խիզախ ընտրություն է կատարել. բայց յաջողութեան գրաւականը, այն գինը, որ պէտք է վճարել, անշուշտ, այդ հաստատութեան անկախութիւնն է»,- ասաց դեսպանը:

---