Սարիբեկ Սուքիասեանը եւ «Այրարատ» տոնավաճառի տնօրէնը ազատ են
արձակուել` չհեռանալու մասին ստորագրութեամբ
15-02-2010 21:02:00 | Հայաստան | Հասարակութիւն
ԵՐԵՎԱՆ, 15 ՓԵՏՐՈՒԱՐԻ, ՆՈՅԵԱՆ ՏԱՊԱՆ: Սարիբեկ Սուքիասեանը եւ
«Այրարատ» տոնավաճառի տնօրէն Արտաշ Ստեփանեանը փետրուարի 15-ին ազատ
են արձակուել: Ոստիկանութեան Էրեբունու քննչական բաժնի որոշմամբ
նրանց նկատմամբ խափանման միջոց է ընտրուել չհեռանալու մասին
ստորագրութիւնը: Այս մասին «ՆՈՅԵԱՆ ՏԱՊԱՆ»-ի թղթակցին յայտնեց
Ս.Սուքիասյանի եւ Ա.Ստեփանեանի պաշտպան, փաստաբան Լուսինէ
Սահակեանը:
Յիշեցնենք, որ փետրուարի 12-ի ժամը 18-ին ՀՀ Ազգային Ժողովի
նախկին պատգամաւոր Խաչատուր Սուքիասյանի եղբայրը`
«Հայէկոնոմբանկ»-ի խորհրդի նախագահ Ս.Սուքիասեանը, եւ Ա.Ստեփանեանը
բերման էին ենթարկուել ոստիկանութեան Էրեբունու բաժին: Ըստ
Ոստիկանութեան պաշտօնական կայքէջի, 2008թ.-ի հոկտեմբերին «Բիւրեղ»
ՓԲԸ-ի սեփականատեր Գոռ Դավթեանը 41 տոկոս բաժնետոմսերը վաճառել էր
Սարիբեկ Սուքիասյանի կնոջը` Ասպրամ Տոնոյանին, սակայն 2009թ.-ի
նոյեմբերին Վճռաբեկ դատարանի կողմից գործարքն անվաւեր էր ճանաչուել,
ինչից յետոյ ՓԲԸ-ում յայտնուել է նոր բաժնետէր, ով ցանկութիւն է
յայտնել գնել իրեն պատկանող բաժնեմասերը: Այս մասին Ս.Սուքիասեանին
տեղեակ պահելու նպատակով Գ.Դավթեանը փետրուարի 12-ի ժամը 13-ի
սահմաներում գնացել է «Սիլ գրուպ»-ի գրասենեակ, որտեղ
«Ս.Սուքիասեանն ու ոմն Արտաշ սպանութեան իրական սպառնալիքների տակ
նրան պարտադրել են ստորագրել բաժնեմասերի հետ կապուած որոշ
փաստաթղթեր»: