Կառավարութիւնը հաւանութեան արժանացրեց Հայաստանի 2010թ.-ի
պետական բիւջէի նախագիծը
28-09-2009 18:00:00 | Հայաստան | Տնտեսութիւն
ԵՐԵՎԱՆ, 28 ՍԵՊՏԵՄԲԵՐԻ, ՆՈՅԵԱՆ ՏԱՊԱՆ: Հայաստանի
կառավարութեան սեպտեմբերի 28-ին արտահերթ նիստում քննարկվեց եւ
հաւանութեան արժանացավ ՀՀ 2010թ.-ի պետական բիւջէի նախագիծը:
Ինչպէս նշեց ՀՀ ֆինանսների նախարար Տիգրան Դավթեանը յաջորդ
տարի հիմնուելով ինչպէս սեփական, այնպէս էլ միջազգային փորձագիտական
գնահատականների վրայ, կանխատեսւում է ՀՆԱ-ի 1,2-1,3% աճ, որի
դէպքում այն կկազմի 3 տրլն 214 մլրդ դրամ: Ինդեքս դեֆլեատորը`
ներքին ծագում ունեցող ապրանքների ինֆլյացիան, կանխատեսւում է 2%,
բիւջէի եկամուտները` 676,7 մլրդ դրամ, որից հարկերը եւ պետական
տուրքերը` 533,5 մլրդ դրամ, սոցիալական վճարները` 105,2 մլրդ դրամ:
Բիւջէն ընդհանուր առմամբ կանխատեսված է 701,7 մլրդ դրամ, ծախսերը`
884,7 մլրդ դրամ, դեֆիցիտը` 183 մլրդ դրամ: Դեֆիցիտ-ՀՆԱ
յարաբերակցութիւնը կկազմի 5,69%: Համայնքների բիւջէները կկազմեն
82,5 մլրդ դրամ:
Ըստ Տ.Դաւթեանի, 2010թ.-ի բիւջէի ծախսերը 85 մլրդ դրամով
պակաս են այս տարուայ բիւջէից` նոյնիսկ այս տարուայ ծախսային
կասեցումներով հանդերձ: Չնայած դրան, ինչպէս այս տարի, եկող տարի
եւս կպահպանուեն սոցիալական, ազգային անվտանգութեանն ուղղուած,
գիտական եւ մի շարք այլ` անկասելի համարւող, ծախսերը: Նախարարի
խօսքերով, եթէ այս տարի բիւջէտային ծախսերի մեծ մասն իրականացուել
է դրսից ներգրաւուած միջոցների հաշուին, ապա եկող տարի դա նոյն
ծաւալներով իրականացնել հնարաւոր չէ. նախ պէտք է սահմանափակուի
ներգրաւուող ռեսուրսների քանակը, որպէսզի բիւջէի դեֆիցիտը մնայ
կառավարելիի սահմաններում, բացի այդ` 2010թ.-ի բիւջէում արդէն
էականօրէն աւելանում են մինչ օրս ներգրաւուած վարկերի սպասարկման
միջոցները, որոնք բաւականին ծանր են:
Յաջորդ տարի կնուազեցուեն, մասնաւորապէս, կապիտալ եւ պետական
կառավարման ծախսերը, պետական ապարատի համար սարքաւորումներ եւ
տրանսպորտային միջոցներ չեն գնուի, կրկնակի անգամ կկրճատուեն
գործուղումային եւ պետական պաշտօնական ընդունելությունների
ծախսերը: Օբյեկտիվորեն կաւելանան մի շարք ծախսեր` քաղծառայողների
աշխատավարձերը, համայնքների դոտացիաները, ինչպէս նաեւ ներգրաւուած
վարկերի սպասարկման ծախսերը: 2010թ.-ի բիւջէի նախագծով եկող տարուայ
համար բիւջէի դեֆիցիտը կանխատեսւում է 183 մլրդ դրամի չափով, որը
պէտք է ծածկուի արտաքին եւ ներքին աղբիւրների հաշուին:
Տ.Դավթեանը տեղեկացրեց, որ 2010թ.-ին կառավարութիւնը կփորձի
7,5 մլրդ դրամի չափով բիւջէտային վարկեր ներգրաւել Համաշխարհային
բանկից, 150 մլն դոլարի չափով` Արժոյթի միջազգային հիմնադրամից.
այդ կառոյցներից առաջինի հետ բանակցութիւններ են տարւում, իսկ
երկրորդի հետ արդէն կայ համապատասխան համաձայնագիր: Դեֆիցիտի փակման
ներքին աղբիւր է պետական պարտատոմսերի տեղաբաշխումը, որից, ըստ
նախարարի, ակնկալւում է ստանալ շուրջ 30 մլրդ դրամ: «Դեֆիցիտի
ֆինանսաւորման բոլոր աղբիւրները յայտնի են»,- ասաց նախարարը: