ՀԱԱԳԱ, 24 ՅՈՒՆԻՍԻ, ՆՈՅԵԱՆ ՏԱՊԱՆ - ՀԱՅԵՐՆ ԱՅՍՕՐ: Նիդեռլանդներում գործող հայկական «Աբովեան» մշակոյթային ընկերութեան ստեղծման 25-ամեայ յոբելեանի առթիւ շնորհաւորական ուղերձ է յղել ՀՀ սփիւռքի նախարար Հրանուշ Յակոբեանը` բարձր գնահատելով ընկերութեան գործունէութիւնը: «Աբովեան» ընկերութիւնը հիմնադրուել է 1984թ. յունիսի 19-ին Նիդեռլանդների Հաագա քաղաքում: Ինչպէս տեղեկանում ենք Հաագայից ստացուած հաղորդագրութիւնից, տարեդարձի առթիւ ընկերութիւնը կազմակերպում է հայկական կինոփառատօն` համագործակցելով Հաագայի Filmhuis Den Haag-ի եւ երեւանեան «Ոսկէ Ծիրան» կինոփառատօնների հետ: Հոկտեմբերի 22-ին մեկնարկելիք փառատոնը կներկայացնի հայկական կինոյի անցած ուղին: Նախատեսւում է նաեւ հրատարակել որոշ գրքեր: Անցած 25 տարիների ընթացքում «Աբովեան» հայկական մշակոյթային ընկերութիւնը հետաքրքիր է դարձրել Նիդեռլանդների հայ համայնքի մշակոյթային կեանքը` կազմակերպելով շաբաթական հանդիպումներ եւ հայոց լեզուի, պատմութեան ու մշակոյթի դասընթացներ, միջոցառումներ, հրատարակելով պարբերականներ: «Աբովեան» մշակոյթային ընկերութիւնը միշտ սերտ յարաբերութիւնների մէջ է եղել Հայաստանի եւ Սփիւռքի հասարակական ու մշակոյթային կազմակերպութիւնների հետ: Բազմիցս դերասանական խմբեր եւ անհատներ են հրաւիրուել մշակոյթային ծրագրերին մասնակցելու համար: Մշակոյթային կենտրոն են այցելել նաեւ ուսանողներ, մարզիկներ, գիտնականներ:

---