ԵՐԵՎԱՆ, 20 ՄԱՐՏԻ, ՆՈՅԵԱՆ ՏԱՊԱՆ: «Մարիոթ-Արմէնիա» հիւրանոցային համալիրում մարտի 20-ին տեղի է ունեցել «Արցախ ՀԷԿ» ԲԲԸ-ի արժեթղթերի տեղաբաշխման շնորհանդէսը, որին մասնակցել են ՀՀ վարչապետ Տիգրան Սարգսեանն ու ԼՂՀ վարչապետ Արա Յարութիւնեյանը: Ինչպէս «ՆՈՅԵԱՆ ՏԱՊԱՆ»-ին յայտնեցին ՀՀ կառավարութեան Տեղեկատուութեան եւ հասարակայնութեան հետ կապերի վարչութիւնից, ընկերութեան կողմից թողարկվող արժեթղթերի տեղաբաշխումն իրականացնում է «Արմենբրոկ» ԲԲԸ-ն: «Արցախ հէկ» ընկերութիւնը նպատակ ունի բաժնետոմսերի տեղաբաշխումից հավաքագրված միջոցներն ուղղել ԼՂՀ-ում մի քանի նոր հիդրոէլեկտրակայանների կառուցմանը: Տ.Սարգսեյանի խօսքերով, նախաձեռնութիւնը խորհրդանշական է ոչ միայն այն պատճառով, որ համաշխարհային ֆինանսական եւ տնտեսական ճգնաժամի պայմաններում կազմակերպւում են նման միջոցառումներ, այլեւ, որ այն կարող է նոր սկիզբ հանդիսանալ ֆինանսական շուկայի ակտիւացման եւ դրա արդիւնքում` տնտեսութեան խթանման համար: Վարչապետը նշել է նաեւ ներդրողների համար ներկայացւող նախագծի գրաւչութիւնը, ենթակառուցուածքների զարգացմանն աջակցելու կարեւորութիւնը, ինչը կնպաստի ԼՂՀ-ում նոր աշխատատեղերի ստեղծմանն ու տնտեսական աճի հնարաւորութիւնների մեծացմանը:

---