Հայաստանն աւարտել է Թուրքիա էլեկտրաէներգիայի մատակարարմանն
ուղղուած նախապատրաստական աշխատանքները
11-03-2009 18:00:00 | Հայաստան | Տնտեսութիւն
ԵՐԵՎԱՆ, 11 ՄԱՐՏԻ, ՆՈՅԵԱՆ ՏԱՊԱՆ: Հայկական կողմն աւարտել է
Թուրքիա էլեկտրաէներգիայի մատակարարմանն ուղղուած նախապատրաստական
աշխատանքները, եւ թուրքական կողմից իրականացyող համանման աշխատանքների
աւարտից յետոյ մատակարարումը կսկսուի: Այս մասին «ՆՈՅԵԱՆ ՏԱՊԱՆ»-ի
թղթակցին յայտնեց ՀՀ Էներգետիկայի եւ բնական պաշարների
նախարարութեան մամուլի քարտուղար Լուսինէ Յարութիւնեյանը:
Յիշեցնենք, որ թուրքական «Յունիտ» ընկերութիւնը այդ երկրի
նախագահի 2008թ.-ի սեպտեմբերի սկզբին Երեւան այցի օրերին ՀՀ
Էներգետիկայի եւ բնական պաշարների նախարարութեան ու «Հայաստանի
բարձրավոլտ էլեկտրական ցանցեր» ՓԲԸ-ի հետ կնքել էր Հայաստանից
Թուրքիա էլեկտրաէներգիայի մատակարարման վերաբերեալ պայմանագիր:
Պայմանաւորուածութեան համաձայն, սկզբնական շրջանում Կարս քաղաքով
տարեկան կարտահանուի 1,5 մլրդ Կվտ/ժ էլեկտրաէներգիա:
Հզորութիւնների մեծացմանը զուգընթաց հնարաւոր է արտահանումը
հասցնել մինչեւ 3,5 մլրդ Կվտ/ժ-ի:
ՀՀ էներգետիկայի եւ բնական պաշարների նախարար Արմէն
Մովսիսեանը 2008թ.-ի դեկտեմբերին յայտնել էր, 2009թ.-ի գարնանից
Հայաստանից Թուրքիա էլեկտրաէներգիայի մատակարարման մասին
պայմանավորվածություններն ուժի մէջ են: Համապատասխան պայմանագիրը
կնքած թուրքական ընկերութիւնը վստահեցրել էր, որ իր կողմից
նախապատրաստական աշխատանքներն իրականացւում են ըստ նախատեսուածի, եւ
որեւէ խնդիր լինել չի կարող: Նա նաեւ համոզմունք էր յայտնել, որ
«էլեկտրաէներգիայի առաքումը կսկսենք ժամանակին»` նշելով, որ
թուրքական կողմի նկատմամբ կասկածի որեւէ հիմք չունի: