«Սինոփսիս»-ը հաջողութեամբ է աւարտել 2008-ի ֆինանսական տարին
05-12-2008 23:00:00 | Հայաստան | Տնտեսութիւն
ԵՐԵՎԱՆ, 5 ԴԵԿՏԵՄԲԵՐԻ, ՆՈՅԵԱՆ ՏԱՊԱՆ: Կիսահաղորդիչների
նախագծման եւ արտադրութեան համար ծրագրային միջոցների եւ մտաւոր
սեփականութեան մշակման ոլորտի համաշխարհային առաջատար «Սինոփսիս
ընկերութիւնը», որի խոշորագոյն մասնաճյուղերից մէկը` «Սինոփսիս
Արմէնիա»-ն, գտնւում է Հայաստանում, յայտարարել է, որ 2008-ի
ֆինանսական տարուայ չորրորդ եռամսյակում (ԱՄՆ-ում ֆինանսական տարին
սկսւում է հոկտեմբերի 1-ին եւ աւարտւում սեպտեմբերի 30-ին) ունեցել
է 352,8 մլն ԱՄՆ դոլարի եկամուտ, ինչը 11,9%-ով աւելին է 2007թ.-ի
ֆինանսական տարուայ չորրորդ եռամսյակի 315,2 մլն դոլարի համեմատ:
Ամբողջ 2008-ի ֆինանսական տարուայ եկամուտը կազմել է 1 մլրդ 337 մլրդ
դոլար, ինչը 10,3%-ով աւելին է 2007-ի ֆինանսական տարուայ 1 մլրդ 212
մլն դոլար եկամտից:
Ինչպէս «ՆՏ»-ին յայտնեց «Սինոփսիս Արմէնիա»-ի
հասարակայնութեան հետ կապերի պատասխանատու Գայեանէ Մարկոսեանը,
«Սինոփսիսի» նախագահ եւ գլխաւոր գործադիր տնօրէն Աարտ դե Ջիզը
յայտարարել է, որ «Սինոփսիսը» չորրորդ եռամսյակի եւ 2008-ի
ֆինանսական տարուայ համար ցոյց է տուել լաւ ֆինանսական եւ
գործառնական արդիւնքներ` ի հեճուկս տնտեսական միջավայրի նշանակալի
փոփոխութիւնների»: Նա ասել է նաեւ, որ «մինչ համաշխարհային
տնտեսական վիճակն անկանխատեսելի է եւ գործարարներին ու սպառողներին
մղում է աւելի պահպանողական գործունէութեան, «Սինոփսիսը» 2009թ. է
մտնում կայուն ֆինանսական, տեխնիկական եւ գործնական հիմքով»:
ԱՄՆ-ի Համընդհանուր ընդունուած հաշուապահական հաշուառման
սկզբունքներին (US GAAP) համաձայն հաշուարկուած «Սինոփսիսի» 2008.-ի
ֆինանսական տարուայ չորրորդ եռամսյակի մաքուր եկամուտը կազմել է 46,4
մլն դոլար` 2007.-ի ֆինանսական տարուայ չորրորդ եռամսյակի 41 մլն
դոլարի դիմաց: Իսկ ամբողջ 2008-ի ֆինանսական տարուայ մաքուր եկամուտը
կազմել է 190 մլն դոլար` 2007-ի ֆինանսական տարուայ 130,5 մլն դոլարի
դիմաց: Ոչ «GAAP» տուեալներով, 2008-ի ֆինանսական տարուայ չորրորդ
եռամսյակի մաքուր եկամուտը կազմել է 62,7 մլն դոլար` 2007-ի
ֆինանսական տարուայ նոյն եռամսյակի 60 մլն դոլարի դիմաց: 2008-ի
ֆինանսական տարուայ մաքուր եկամուտը կազմել է 252,9 մլն դոլար`
2007-ի ֆինանսական տարուայ 24,9 մլն դոլարի դիմաց: