ԵՐԵՎԱՆ, 3 ՅՈՒՆԻՍԻ, ՆՈՅԵԱՆ ՏԱՊԱՆ: Քաղաքացիական հասարակութեան ինստիտուտ ՀԿ-ն (CSI), որը հանդիսանում է Մարդու իրաւունքների միջազգային ֆեդերացիայի (FIDH) անդամ կազմակերպութիւնը Հայաստանում, իր մտահոգութիւնն է յայտնել ոստիկանութեան կողմից մայիսի 31-ին Երեւանում մարդու իրաւունքների խախտումներով զուգորդուած գործողութիւնների կապակցութեամբ, երբ ընդդիմութեան մի խումբ ակտիւիստների մուտքը Ազատութեան հրապարակ արգելւում էր: Ինչպէս նշւում է կազմակերպութեան յունիսի 3-ի յայտարարութիւնում, ոստիկանութեան բիրտ գործողութիւնների արդիւնքում առաջացաւ մօտ 1 ժամ տեւած քաշքշուկ, որը զուգորդվում էր երկկողմանի վիրաւորանքներով: Մի շարք քաղաքացիական հագուստով մարդիկ կատարում էին ոստիկանների հրահանգները եւ նրանց հետ միասին իրականացնում էին ուժային գործողութիւններ: Արդիւնքում 17 քաղաքացի բերման են ենթարկուել ոստիկանութիւն: Նրանցից 3-ը` Դավիթ Քիրամիջյանը, Սարգիս Գեւորգեանը եւ լրագրող Անի Գեւորգեանը, ձերբակալուել են եւ ներկայումս գտնւում են անազատութեան մէջ: Ըստ CSI-ի, նոյն օրը երեկոյեան ոստիկանները ուժային գործողութիւնների են դիմել նաեւ Կենտրոն ոստիկանութեան բաժնի մօտակայքում հաւաքուած իրաւապաշտպան կազմակերպութիւնների ներկայացուցիչների եւ այլ անձանց նկատմամբ: «Մենք գտնում ենք, որ ոստիկանութեան նման գործողութիւնները չունեն օրինական հիմնաւորում, խախտում են ՀՀ քաղաքացիների արտայայտուելու եւ ազատ տեղաշարժի իրաւունքը եւ լրացուցիչ լարուածութիւն են ստեղծում հասարակությունում: Գտնում ենք, որ Դավիթ Քիրամիջյանին, Սարգիս Գեւորգեանին եւ Անի Գեւորգեանին անազատութեան մէջ պահելն անհիմն է: Պահանջում ենք անյապաղ ազատ արձակել ձերբակալուածներին: Դադարեցնել քաղաքացիների արտայայտուելու եւ ազատ տեղաշարժի իրաւունքների սահմանափակումները: Հետաքննել եւ պարզել քաղաքացիական հագուստով անձանց` ոստիկանութեան գործողութիւններին մասնակցութեան հանգամանքները»,- ասւում է CSI-ի յայտարարութիւնում:

---