ԲԵՅՐՈՒԹ, 18 ՄԱՅԻՍԻ, ՆՈՅԵԱՆ ՏԱՊԱՆ-ՀԱՅԵՐՆ ԱՅՍՕՐ: Մայիսի 6-ին
Լիբանանում նշուեց «Թռչնի բոյն» (Birds' Nest) հայկական որբանոցի
հիմնադիր, դանիացի միսիոներուհի Մարիա Ջակոբսոնի մահուան 50-րդ
տարելիցը:
«Թռչնի բոյն»-ը գոյութիւն ունի շուրջ 90 տարի: Որբանոցի
պատմութիւնը հայոց պատմութեան անբաժանելի մասն է կազմում, քանի որ
այն օգնել է ցեղասպանությունից փրկուածներին եւ դաստիարակել
հազարաւոր հայերի, ովքեր այժմ սփռուած են աշխարհով մէկ:
Birds' Nest-ի պատմութիւնը սկսուել է Մերձաւոր Արեւելքի
ամերիկեան օգնութեան կազմակերպութիւնից, որը հիմնուել էր Առաջին
համաշխարհային պատերազմի ժամանակ, որպէսզի մեղմացնի հայ ժողովրդի
տառապանքը Օսմանեան Կայսրութեան կողմից կատարած ցեղասպանությունից:
Շուրջ 4000 որբեր, որոնց ծնողները սպանուել էին, Օսմանեան
Կայսրութիւնից բերուել էին Birds' Nest որբանոց, որը գտնւում էր
Լիբանանում: Յետագայում որբանոցը յանձնուել էր դանիացի միսիոներ
Մարիա Ջակոբսոնին, ով ազատ խոսում էր հայերէն եւ սկսել էր աշխատել
հայ որբերի հետ 18 տարեկանից ի վեր` նվիրելով նրանց իր կեանքը
մինչեւ մահ:
Հանգուցեալ առաքելուհին 18 տարեկան էր, երբ լքելով իր
հայրենիքը` Դանիան, մեկնել էր Խարբերդ` օգնութեան ձեռք մեկնելու
ջարդերի ենթարկված հայ ժողովրդին եւ հաւաքելով նրա որբացած
զավակներին` տեղափոխել եւ տեղավորել էր որբանոցներում, ի վերջոյ
հաստատվելով Ժիպէյլում, որտեղ հիմնուած էր «Թռչնի Բոյն» որբանոցը:
Արիասիրտ միսիոնարուհին մինչեւ իր կեանքի վերջը մնաց այս
հաստատութիւնում: Յետագայում նա անգամ մերժեց թաղվել իր
հայրենիքում, մնալով «Թռչնի Բոյն»ի յաւերժական բնակիչը:
Իւրաքանչիւր հայ, ով 1928-1960 թթ. եղել է այդ որբանոցում,
կոչում էր նրան «Մայրիկ», քանի որ նա իր վրայ պարտականութիւն էր
վերցրել մայրութիւն անել հազարաւոր երեխաներին:
1970թ.-ին Birds' Nest հաստատութիւնը յանձնուել էր Կիլիկիայի
հակական եկեղեցուն, որպէսզի այն շարունակի իր առաքելութիւնը` հոգ
տանելով հայ երեխաներին, ովքեր տան կարիք ունեն: Սկզբում երեխաների
թիւը Birds' Nest-ում հասնում էի 4000, իսկ այժմ այնտեղ ապրում է
36 երեխայ:
Ցեղասպանությունից մազապուրծ բամաթիվ երեխաների Մայրիկի`
Մարիա Ջակոբսոնի յիշատակի օրը նշուեց Լիբանանում Մայրերի օրուայ
կապակցութեամբ:
Ինչպէս տեղեկացնում է Ռադիո Վատիկանը, «Թռչնի Բույնի» Տիկնանց
յանձնախումբը տարին մէկ անգամ կազմակերպում է ճաշկերոյթ, որին
հրաւիրում է լիբանանահայ բարեգործական միութիւնների, եկեղեցասիրաց
տիկնանց վարչութիւնների, ԼՕԽ-ի մասնաճիւղերի վարչութիւնների ու
Բեյրութի հայաշատ թաղամաս Պուրճ Համուտի քաղաքապետարանի
ներկայացուցիչներին Մայրերի օրուայ կապակցութեամբ: Այս տարի այդ տոնը
տեղի ունեցաւ «Թռչնի Բույնի» սրահում, ուր հիշվեց նաեւ Մարիա
Ջակոբսոնին` դանիացի միսիոներ-առաքելուհու, մահուան 50-րդ տարելիցը:
«Թռչնոց Բույնի» «թռչնիկները» 300-ից աւելի ներկաների համար
պատրաստել էին գեղարուեստական ծրագիր` երգ, պար եւ
արտասանություններ: Ճաշկերոյթի ընթացքում ելոյթ ունեցան երգչուհի
Անայիս Նանեճեան-Կետիկեանը, երգիչ Գէորգ Պեպեճեանը, ասմունքող Մակի
Մկրտիչեանը: Ներկաները կատարեցին սրտաբուխ նվիրատվությններ` յօգուտ
«Թռչնի Բույնի»:
Հայր Գրիգոր Ծ վարդապետ Չիֆթճեանն իր պատգամն ուղղեց բոլոր
մայրերին, ընդգծելով հայ մայրերի նուիրումն ու զոհաբերությունը: Ապա
նա ոգեկոչեց Մարիա Ջակոբսոնի յիշատակը: