Ապրիլի 14-ին Ազգային ժողովը 64 «կողմ» եւ 5 «դէմ» ձայներով երրորդ ընթերցմամբ եւ ամբողջութեամբ ընդունեց «Հաւաքների ազատութեան մասին» օրէնքի եւ դրան կից մի շարք գործող օրէնքներում փոփոխութիւնների նախագծերի կառավարութեան հեղինակած օրէնսդրական փաթեթը: Օրէնքն ուժի մէջ մտնելու պահից ուժը կորցրած կը ճանաչուի «Ժողովներ, հանրահաւաքներ, երթեր եւ ցոյցեր անցկացնելու մասին» 2004թ.-ից գործող օրէնքը: Նոր օրէնքի գործողութիւնն այլեւս չի տարածւում բոլոր տեսակի միջոցառումների վրա, այլ սահմանափակւում է միայն հաւաքներով։ Հաւաք է համարւում «երկու կամ աւելի անձանց խաղաղ եւ առանց զէնքի ժամանակաւոր ներկայութիւնը որեւէ վայրում` հանրային հետաքրքրութիւն ներկայացնող հարցերի շուրջ ընդհանուր կարծիք ձեւաւորելու կամ արտայայտելու մտադրութեամբ»: Նշենք, որ, կառավարութեան հիմնաւորմամբ, հաւաքների մասին նոր օրէնքի ընդունման անհրաժեշտութիւնը պայմանաւորուած է այն հանգամանքով, որ գործող օրէնքի ընդունումից յետոյ դրանում կատարուել էն մի շարք փոփոխութիւններ եւ լրացումներ, այդուհանդերձ, փոփոխութիւնների եւ լրացումների մի մասը սուր քննադատութեան էն արժանացել ոչ միայն ՀՀ-ում, այլեւ բացասական գնահատական էն ստացել Վենետիկի յանձնաժողովի եւ ԺՀՄԻԳ համատեղ եզրակացութիւնում: Օրէնսդրական փաթեթի քուէարկութեանը չմասնակցեցին ՀՅԴ խմբակցութեան անդամները, բացառութեամբ «դէմ» քուէարկած Լիլիթ Գալստեանի եւ Արա Նռանեանի: «Դէմ» քուէարկեցին նաեւ անկախ պատգամաւորներ, ԱԺ նախկին նախագահ Տիգրան Թորոսեանը եւ Վիկտոր Դալլաքեանը, «Ժառանգութիւն» խմբակցութեան անդամ Վարդան Խաչատրեանը: «Ժառանգութիւն» խմբակցութեան միւս անդամները շարունակում էն ԱԺ նիստերի բօյկօտը:

---