Մադագասկարի ընդդիմութեան առաջնորդը իրեն յայտարարել է երկրի
նախագահ
18-03-2009 16:21:00 | | Միջազգային
ԱՆՏԱՆԱՆԱՐԻՎՈՒ, 18 ՄԱՐՏԻ, ՆՈՅԵԱՆ ՏԱՊԱՆ: Մադագասկարի
ընդդիմութեան 34-ամեայ առաջնորդ Էնդրյու Ռաջոյելինան զինուորական
հրամանատարութեան առաջնորդի կողմից լիազօրութիւններն իրեն
փոխանցվելուց յետոյ իրեն յայտարարել է երկրի նախագահ:
«Ռավալոմանանան (Մադագասկարի նախկին նախագահը) հենց նոր
հրաժարական է տուել, ասել է թէ նաեւ իր կառավարութիւնը եւ
վարչապետը, եւ, այդպիսով, ես անցումային կառավարութեան ղեկավարն
եմ... հիմա դուք կարող եք ինձ կոչել նախագահ»,- հեռախօսազրոյցի
ժամանակ ֆրանսիական LCI հեռուստաալիքին յայտարարել է Էնդրյու
Ռաջոյելինան:
Ռաջոյելինան նշել է, որ նոր կառավարութիւնը, որ շուտով
կձեւաւորուի, երկու տարուայ ընթացքում երկրում կկազմակերպի
նախագահական ընտրութիւններ, եւ որ այդ ընտրութիւններում նա հոյս
ունի ստանալ ժողովրդի աջակցութիւնը:
Քաղաքական ճգնաժամը Մադագասկարում ակտիւ փուլ մտաւ յունուարին,
երբ նախագահին բռնապետութեան մէջ մեղադրող ընդդիմութեան առաջնորդ
Էնդրյու Ռաջոյելինայի կողմնակիցները Անտանանարիվուի կենտրոնական
հրապարակում հանրահաւաք կազմակերպեցին, որը վերաճեց
անկարգութիւնների:
Մի քանի օր շարունակւող հուզումների զոհ դարձան մօտ 70 մարդ:
Ընդամէնը ճգնաժամի սկզբից ի վեր ընդդիմութեան եւ անվտանգութեան
ուժերի բախումների հետեւանքով զոհուել է աւելի քան 135 մարդ: