ԱԹԷՆՔ, 23 ՓԵՏՐՈՒԱՐԻ, ՆՈՅԵԱՆ ՏԱՊԱՆ: Երկու յայտնի յանցագործներ Աթէնքի խիստ ռեժիմի «Կորիդալլոս» բանտից փախուստի են դիմել ուղղաթիռով, հաղորդում է BBC-ն: Ուղղաթիռը իջել է բանտի տանիքին, որից յետոյ Վասիլիս Պալեոկոստասն ու Ալկետ Ռիցայը պարանասանդուղքով բարձրացել են այնտեղ: Յոյն Պալեոկոստասը եւ իր մեղսակից ալբանացի Ռիցայը սպասում էին դատաւարութեան փախուստի համար, որ նրանք կատարել էին 2006 թուականի յունիսին: Նրանք փախել էին նոյն բանտից միեւնոյն եղանակով` ուղղաթիռի օգնութեամբ, որը վայրէջք էր կատարել բանտի բակում, երբ կալանաւորները ֆիզիկական վարժութիւններ էին անում: Պահակախումբը կարծել է, թէ ուղղաթիռով յանձնաժողով է ժամանել` բանտում տեսչական ստուգում կատարելու համար: Վասիլիս Պալեոկոստասը բանտարկուած էր մի քանի հանցագործությունների համար, այդ թւում` գործարարի առեւանգման, որին ազատ էր արձակել խոշոր փրկագնի դիմաց: Պալեոկոստասը ձերբակալուել էր 2008 թուականի օգոստոսին: Բանտում է գտնւում նաեւ նրա եղբայր Նիկոսը, որն էլ մշակել էր ուղղաթիռի օգնութեամբ առաջին փախուստի պլանը:

---